Ыам ыйын 23 күнүттэн бэс ыйын 3 күнүгэр диэри Сочи куоракка бүтүн Россиятааҕы «Чудо-шашки» диэн оскуола оҕолорун хамаанданан бастыыр иһин күрэхтэһиитэ ыытылынна. Быйылгы күрэхтэһиигэ барыта Россия 24 регионуттан, 24 оскуола хамаандата кытынна. Биһиги республикабыт чиэһин Дьокуускай куорат 2 нүөмэрдээх оскуолатын оҕолоро көмүскээтилэр. Хамаанда састаабыгар Рома Николаев — 7 кылаас, маастарга кандидат, Юля Никанорова — 7 кылаас, маастарга кандидат, Айсаар Колодезников — 6 кылаас, бастакы разрядтаах уонна Глеб Борисов — 5 кылаас, маастарга кандидат оонньоотулар.
Күрэхтэһии хара маҥнайгыттан сүрдээх тыҥааһыннаахтык саҕаламмыта. Бүтэһик туурга дылы ким бастыыра биллибэт этэ. Бүтэһик туурга биһиги оҕолорбут уонна Ишимбай куорат 2 -с оскуолата 46 очколаах тэҥҥэ испиттэрэ. Оҕолорбут Екатеринбург кытааччыларын 6 : 4 ахсааҥҥа хотон, барыта 52 очкону ылан эрэллээхтик бастаан таҕыстылар.
2 оскуола хамаандата былырыыҥҥы чемпионнары, Калуга куорат 14 оскуолатын үөрэнээччилэрин, иккис миэстэлээх Удмуртия хамаандатын 5 : 3 — кэ хотуталаатылар. Ону таһынан, Москва, Екатеринбург, Североднискэй (Архангельскай), Усть — Ордынскай (Иркутскай) 6 : 2, Тверь куорат 44 гимназияттан — 7 : 1, Кировскай уобалас оҕолорун 8 : 0 ахсааҥҥа хотуталаатылар. Уонна Башкортостан кыттыылахтарын кытары тэҥнэстилэр. Үөрэнээччилэрбит маннык улахан таһымнаах күрэхтэһиигэ төһө да бастакытын кытынналлар, билиилэрин, сатабылларын ыһыктыбакка кыайбыттара хайҕаллаах.
Таарыччы эттэххэ, 2 оскуола аатыттан «Чудо-шашки» күрэхтэһиигэ уопсайа аҕыста кытыннылар. Онтон 3 бастаатылар, түөртэ 2, биирдэ 3 буолбуттара. 2 оскуола администрацията дуобакка, саахымакка улахан болҕомтону уурар уонна оҕолорго мэлдьи көмө буолар.
Василий Иннокентьевич Кононов, тренер