Өрөспүүбүлүкэтээҕи лиссиэй-интэрнээт 11 кылааһын үөрэнээччитэ Елизавета Алексеева «Моя страна — моя Россия» Бүтүн Арассыыйатааҕы куонкуруска Аҕа дойду уоттаах сэриитигэр оҕолорун сүтэрбит ийэлэр олохторун, дьылҕаларын туһунан «Ийэ сүрэҕэ саллаакка» бырайыагынан үрүҥ көмүс мэтээли ылары ситистэ.
Бу куонкурус түмүгүнэн эдэр чинчийээччи «Россия – страна возможностей» былаһаакка уонна куонкурус кыттыгастаахтарын өйөбүллэрин ылыаҕа.
«Быйыл куонкуруска 90-тан тахса тыһыынча киһи кыттыыны ылла. Мин «Моя страна. Моя история. Мой космос» диэн хайысхаҕа кытынным. Мин хайысхабар барыта 17 оҕо кыттааччы баара. Аҕа дойду Улуу сэриитин кэмигэр оҕолорун сүтэрбит ийэлэр ааттарын үйэтитэргэ «Ийэ сүрэҕэ саллаакка» бырайыагы үлэлэттибит. Сыалбытын ситистибит дии саныыбын. Бырайыакка көмөлөспүт оҕолорго, дьоҥҥо улахан махтал. Кинилэр оҕолорун сэриигэ сүтэрбит күндү ийэлэр ааттарын үйэтитэргэ туох баар кыһамньыларын, болҕомтолорун ууран туран үлэлээтилэр», – диэн кэпсиир Елизавета Алексеева.
Үөрэнээччилэр хамаанданан үлэлээн, элбэх иһитиннэриини буллулар, Кыайыы волонтердарын кытыннаран, уопсайа 40-чэ ийэ аатын-суолун булан таһаардылар. Ону тэҥэ «Ийэ сүрэҕэ саллаакка» диэн хомуурунньук таҥыллан таҕыста. Бу эмиэ оҕолор ситиһиилэрэ, сыралаах үлэлэрэ.
Сэрии тулаайахтарын, сэрии огдооболорун, сэрии уоттаах хонуутугар оҕолорун сүтэрбит ийэлэр ыар олохторун эдэр көлүөнэ үөрэтэрэ, ырытара, кинилэр ааттарын киэҥ эйгэҕэ тарҕатара бу хайҕаллаах суол.