Биһиги агро хайысхалаах оскуолабытыгар «Эрчимил» лааҕыр үлэлиир. Манна уопсайа 25 оҕо сылдьар.
Сайыммыт кэлэн оскуола таһынааҕы учаастакка үлэбит саҕаламмыта. Инники сылларга оҕуруотунан эрэ дьарыктанар эбит буоллахпытына, быйыл үлэбитигэр кус, хаас, куурусса көрүүтэ эбилиннэ. Бу көтөрдөрү Евдокия Вячаславовна Другина салалтатынан саас инкубаторга таһаарбыппыт. Кустары, хаастары Илин Тоҕойго илдьэн кыра көлүйэҕэ сөтүөлэтэбит. Онно тиийэн дуоһуйа усталлар, сууналлар, ыраастаналлар.
Бөһүөлэкпит ыһыаҕа бу бэс ыйын бүтүүтэ буолуохтаах. Онно анаан 100 л кымыс бэлэмниибит. Былырыыҥҥы ыһыахха эмиэ бэлэмнээбиппит. Дьон сирбэтэҕэ, кымыспыт сатанан хайҕаммыппыт. Рассада, оҕуруот атыылаан киллэриммит харчыбытыттан, биһиэхэ суох талахтары, мастары (черемуха, акация, калина…) 20 тыһыынчаҕа атыылаһан, оскуола территориятыгар былырыын олордубуппут, ол үүнээйилэрбит быйыл көҕөрөннөр үөрдүбүт. Оҕуруоппут үүнүүтэ кэминэн да, быйыл тымныы сайын буолан арыый бытаан. Хас да күннээх хаар түһэн үлүйүөхтэрин, теплицаларбыт оһохтоох буоланнар уонна хаппыыстаны, хортуосканы, сибэккилэрбитин бүрүйэн үлүппэтибит. Онно интернет көмөтүнэн прогноһу эрдэ билэрбит бэркэ көмөлөстө. Сайыҥҥы хаалбыт күннэргэ оҕуруоппут аһа ситэн элбэх үүнүүнү ылыахпыт диэн эрэнэбит.
Айыына Сотрудникова, 10 кылаас,
Арыылаах агро хайысхалаах орто оскуолата, Үөһээ Дьааҥы