Бэҕэһээ өрөгөйдөөх, алта Ленин уордьаннаах комсомол төрөөбүтэ 102 сылыгар анаан, Кустуур оскуолатын кэллэктиибэ уруоктар кэннилэриттэн ГП ГПУ » Бытантай» саха ынаҕын иитэр пиэрмэҕэ баран хотон сыбаан, көмөлөһөн субуотунньуктаан кэллилэр.
Валентина Николаевна Колесова, И.Н.Слепцов аатынан Кустур орто оскуолатын производственнай үлэҕэ дириэктэри солбуйааччы, технология учуутала:
— Биһиги нэһилиэк киэн туттуутунан саха боруодатын ынаҕа буолар.
Эбээн Бытантай национальнай улууһун Кустуур нэһилиэгин агрооскуолатыгар 108 оҕо үөрэнэр. Оскуола үлэһиттэрэ, оскуола оҕолоро бу тэрилтэни кытта дуогабардаһан, үлэлэриттэн быыс булан, кыра да буоллар, дьоһун кылааттарын киллэрэллэр.
ГП ГПУ » Бытантай » саха ынаҕын тэрилтэтигэр 19 торбос, 3 оҕус, 1 аттаммыт оҕус уонна субан сүөһү турар, барыта 115 сүөһү кыстыкка баар. Хотонноро былыргы, сэбиэскэй кэмнээҕи буолан, тымныы. Элбэх үлэни эрэйэр, сыл аайы ынах сааҕынан сыбанан турар. Бырабыыталыстыба быйылгыттан саҥа хотон тутуутун былааннаан, аны ол тутулларын кэтэһэбит.
Биһиги кэллэктииппит бу дьыл алтынньы 29 күнүгэр, алта Ленин орденнаах Комсомол төрөөбүтэ 102 сылыгар түбэһиннэрэн, сэмэй кылааппытын киллэрэн, алтыс уруок кэнниттэн күргүөмүнэн баран сыбахха көмөлөһөн субуотунньуктаан кэллибит.
Отделение управляющайынан манна эдэр киһи Сотрудников Егор Михайлович үлэлиир. Иллээх кэллэктиипкэ 2 доярка,1 субан сүөһүнү көрөөччү, 1 торбос көрөөччү, 1 фуражир, оробуочай, 1 тракторист үлэлииллэр.
Сахабыт ынаҕын өрөспүүбүлүкэҕэ, араас улуустарга тарҕатарга, бу биһиги Кустуурбут нэһилиэгиттэн сэбиэскэй былаас саҕана былааннаах үлэ барбыта. Мантан кэлэн бөртөлүөтүнэн элбэх эдэр ыччат сүөһүнү илдьэн тарҕаппыттара.
Сүөһүлэрбит ахсааннара аҕыйаабатар диэн нэһилиэнньэ олус долгуйар. Урукку сылларга элбэх сүөһүлээх, сылгылаах, табалаах улахан отделение буолан олорбуппут.
Эдэр ыаллар нэһилиэкпитигэр сүөһү иитиитинэн дьарыктанан эрэллэрэ — хайҕаллаах суол. Ол курдук, элбэх оҕолоох Старостин Василий Кимович, Горохов Михаил Ильич, Анжела Игорьевна, эдэр ыал Слепцова Анна Петровна, Николай Афанасьевичтаах, орто саастаах дьоннорбут да Старостин Максим Васильевич уонна Елена Александровна, Марта Степановна Горохова Петр Петрович, Максим Ильич Аммосов, Акулина Егоровна уо.д.а атыттар курдук үлэһит дьоннордоох буоламмыт, сахабыт ынаҕа өлбөт, сүппэт дьылҕалаах.