Олунньу 8-9 күннэригэр Дьокуускай куоракка оҕолорго сахалыы атах оонньуутугар өрөспүүбүлүкэҕэ биирдиилээн бастыыр иһин күрэх ыытылынна. Манна Саха сирин бастыҥ атах оонньооччулара кытыннылар. Барыта 150 спортсмен кыттыыны ылла, олор истэригэр Ньурбаттан 5 оҕо.
Антоновка орто оскуолатыттан 2012-2013 сс. төрүөхтэргэ София Лисовенко, Максим Иванов, онтон 2010-2011 сс. — Айтал Васильев кытыннылар. Маар орто оскуолатыттан 2008-2009 сс. төрүөхтэргэ Арылхан Андреев 5 миэстэ буолла, 2012-2013 сс. уолаттарга Дьулустаан Васильев куобахха — 2 миэстэ, кылыыга — 1 миэстэ буолан чемпион үрдүк аатын сүктэ!
Атын спортсменнарбыт төһө даҕаны үс иһигэр киирбэтэллэр, хамаанда туһугар кыахтарынан кыттыбыттарын бэлиэтиир наадалаах.
Дьулустаан Васильев оҕолорго улууспутугар атах оонньуутун спордугар саҥа кэрчиги арыйда.
Оҕолорбутугар, тренердарыгар Семенов Афанасий Васильевичка, Васильев Илья Гаврильевичка инникитин өссө да ситиһиилэр кэлэ туралларыгар баҕарабыт.
«Юла» медиакиин, Маар орто оскуолата, Ньурба.
keskil14.ru