Аҕа дойду көмүскээччилэрин күнүн көрсө «Хорсун быһыы иһин» РФ Судаарыстыбаннай мунньаҕын өйдөбүнньүк мэтээлинэн наҕараадаламмыт эдэр көмүскээччилэр тустарын кэпсиибит.
Анаабыр улууһун Сааскылаах орто оскуолатын 7-б кылааһын үөрэнээччилэрэ Лаврентий Назаров, Сахамин Андросов уонна Анаабыр гимназиятын 7 кылааһын үөрэнээччитэ Азалия Абдирашитова былырыын ыам ыйыгар, өрүс мууһа бара турар кэмигэр, биэс саастаах оҕону ууттан быыһаан тураллар.
Лаврентий уонна Сахамин СӨ «Юнармия» Бүтүн Арассыыйатааҕы оҕо байыаннай-патриотическай хамсааһынын эрэгийиэннээҕи салаатын актыбыыстара. Бүгүн биһиги кинилэри кытары кэпсэттибит.
— Былырыын ыам ыйын 28 күнүгэр мин, Сахамин уонна Азалия буолан оҕо былаһааккатыгар оонньуу сылдьыбыппыт. Ити кэмҥэ Анаабыр Эбэбит мууһа бара турара. Былаһаакка аннынан Эбэҕэ түһэр сүүрүктээх үрүйэ устара. Ол үрүйэни туоруур кыра муостаҕа үс кыра кыргыттар кэлбиттэрэ. Биэс саастаах Лияна Андросова үрүйэҕэ түһэрбит оонньуурун ылаары, ууга түспүтүн көрбүппүт. Сонно тута биһиги сүүрэн тиийбиппит. Оҕо ууга устан иһэрин, Лаврентий тымныы ууга киирэн, тутан ылан, Сахамин илиитигэр Лиянаны туттарбыта. Сахамин кууркатын устан, оҕоҕо биэрбитэ. Онтон улахан дьон сүүрэн кэлэн көмөлөспүттэрэ, — диэн уолаттар кэпсээтилэр.
— Уолаттар, эһиги хорсун быһыыны оҥордубут дии саныыгыт дуо?
Манна Сахамин бу курдук эппиэттээтэ: «Мин санаабар, хас биирдии киһи биһиги миэстэбитигэр инник быһыыланыа этэ диэн толкуйдуубун».
— Оччотугар эр санаа диэн тугуй?
Сахамин: — Эр санаа диэн хорсун буолуу, хайдах да түгэҥҥэ күүстээх санааны ылынан, сөптөөх хамсаныылары оҥорооһун буолара буолуо.
Лаврентий: — Эр санаалаах диэн киэҥ көҕүстээх, эппит тылыгар турар, чиэһинэй киһи буолуо, мин толкуйдуурбунан.
— Бэйэҕит саастыылаахтаргытыгар баҕа санааҕыт тугуй?
Лаврентий: — Оҕолор, куруук хорсун уонна күүстээх санаалаах буолуҥ. Доҕордоһууну сыаналааҥ уонна кыһамньылаах үөрэҕи баҕарабын.
Сахамин: — Төрөппүттэргитин уонна учууталларгытын куруук убаастааҥ, кинилэр мындыр сүбэлэрин эккитигэр-хааҥҥытыгар иҥэринэ сылдьыҥ.
Ахсынньы 26 күнүгэр Лаврентий Назаровка, Сахамин Андросовка уонна Азалия Абдирашитоваҕа «Хорсун быһыы иһин» РФ Судаарыстыбаннай мунньаҕын өйдөбүнньүк мэтээлин Анаабыр улууһун баһылыгын бастакы солбуйааччыта Василий Алексеев үөрүүлээх быһыыга туттарбыта.
keskil14.ru