Олунньу 5 күнүгэр нэһилиэкпитигэр «Тускул» сынньалаҥ кииҥҥэ Василий Васильевич Лукин киһи доруобуйатын, арыгы, дьол, стресс туһунан «Хоту киһитин доруобуйата» диэн тиэмэҕэ кэпсэтиини ыытта.
Арыгы дьиҥинэн, тугу гынарый? Бастаан чэпчэки эйфория, сынньалаҥ. Онтон утуйуу кэһиллиитэ, сылайыы-элэйии, дьиксинии, кыыһырыы. Арыгы кыһалҕаны устубат, кылгас кэмҥэ көннөрү хараххын эрэ сабар.
Дьол уонна кыайыы. Бииргэ туппуппут, тыыннаах хаалбыппыт, кимиэхэ эмэ көмөлөспүппүт. Үгүстэр «ыарахан да буоллар кыайбыппыт» диэн саамай сырдык түгэннэрин ахталлар. Итиннэ ураты хотугу дьол баар: ыарахан кэмнэри соҕотоҕун туорааһын буолбатах. Санааҕын дьоҥҥо кэпсиэхтээххин. Дьонтон көмө наада. «Барытын бэйэм оҥоруом» дии сырыттаххына, төттөрүтүн күүркэйии кэлиэн сөп.
Стресс эккэ-сииҥҥэ хайдах дьайарый? Стресскэ организм охсуһуу эбэтэр куотуу режимигэр киирсэр.
Василий Васильевич Лукин Хадаарга буолбут көрсүһүүтүгэр элбэх киһи кэлэн иһиттэ, ыйытыы биэрдэ. Кэпсэтии туһалаахтык ааста.
Кини атын регионнарга сылдьан, элбэх сиргэ, араас куораттарга доруобуйаҕа сыһыаннаах тиэмэлэргэ, ол иһигэр ГТО туһунан маннык кэпсэтиилэри ыыппытын, научнай дакылааттарынан кыттыбытын туһунан этэр.
Василий Васильевич харчы киһини төһө дьоллоох, туһалаах оҥорорун туһунан санаатын үллэһиннэ. – Харчыны энергия курдук өйдүөххэ наада. Харчы баар буоллаҕына киһи энергия курдук буолар. Оччоҕо кыаҕын улаатар: эн үөрэнэ барыаххын, сайдыаххын сөп. Ол эрээри харчы киһини толору дьоллообот. Элбэх харчы киһини буорта гыныан сөп, – диэн кини этэр.
Василий Васильевич биһиги нэһилиэкпитигэр сыһыаран, 2030 сылга нэһилиэкпитигэр спордунан, туһалаах хамсаныынан дьарыктаныы нэһилиэнньэ 70 бырыһыанын хабыахтаах. Онуоха сыаллаан-соруктаан нэһилиэкпитигэр ыытыллар спортивнай оонньуулар, күрэхтэһиилэр туһунан сырдатта. Онуоха сүрүн күрэхтэһиилэринэн полиатлон, эстафета, дуобат, саахымат, хайыһар буолаллар.
Виталий ОРЛОВ, IX кылаас,
С.Д. Флегонтов аатынан Хадаар орто оскуолата, Чурапчы