Ыам ыйын 22 күнүгэр, сайыны көрсүү уонна оҕо саас чаҕылхай түһүмэҕин, бастакы кылааһы, ситиһиилээхтик түмүктүүр үөрүүлээх күнэ буолан ааста.
Биһиги кырачаан үөрэнээччилэрбит биир үөрэх дьылын устата элбэҕи биллилэр-көрдүлэр, саҥа доҕоттору, билиини, сатабыллары баһылаатылар. Кинилэр бастакы кылааһы бүтэрээччилэр аатын чиэстээхтик сүгэр кыахтаннылар.
Бу ситиһиигэ учууталларбыт сыралара, билиилэрэ, эйэҕэс майгылара улахан оруолу ыллылар. Кинилэргэ дириҥ махталбытын тиэрдэбит.
Төрөппүттэрбитигэр эмиэ махтал тылларын этэбит. Оҕолоргут ситиһиилэрэ эһиги өйөбүлүгүтүн, тапталгытын уонна болҕомтоҕутун күүһүнэн ситиһилиннэ.
Бу бэлиэ тэрээҺиҥҥэ оскуолабыт психолога Саввинова В.Г. уонна библиотекарь Левина О.Д. Ньукуолун суолтатын туҺунан оҕолорго кэпсээтилэр, хас биирдии үөрэнээччи төрөппүтүн кытта салама баайдылар.
Эйэҕэс ийэлэр, эбээлэр алгыстаах алаадьынан, минньигэс быырпаҕынан оҕолорун уонна бука бары ыалдьыттары айах туттулар.
Директоры иитии үлэҕэ сүбэҺит Павлова М.Е. кырачаан үөрэнээччилэргэ маҥнайгы кылааҺы түмүктүүр туҺунан диплому, төрөппүтэргэ махтал суругу уонна кылаас салайааччыларыгар Строева М.М, Захарова А.Д. махтал суруктары туттарда.
5 кылаастар үҥкүүнү оройуттан туттулар, төрөппүт Антон Петров салайыытынан оҺүохайдаан тэптилэр, «Күн» оҕолор түмсүүлэрин кытта оонньоон ойуоккаластылар.
Сайын – сынньалаҥ, айылҕалыын алтыһыы, саҥа билиини ылыы кэмэ. Оҕолорбут күүстэрин-уохтарын чөлүгэр түһэрэн, саҥа үөрэх дьылыгар өссө күүстээхтик, билиилээхтик киириэхтэрэ диэн эрэнэбит. Барыгытыгар этэҥҥэ сайыны атаараргытыгар, үгүс үөрүүнү-көтүүнү, дьолу-соргуну баҕарабыт.
Сайыммыт эйэлээх, сырдык, үтүө түгэннэрдээх буоллун! Бары бииргэ буоламмыт, оҕолорбут сайдыыларыгар кыһамньыбытын ууруохпут диэн эрэнэбит.
Сайаана Терехова, 10 кылаас, «Дьоҕур» медиакиин, Кэбээйи орто оскуолата