Таатта улууһун Игидэй орто оскуолатын «Хомус алыба» ансаамбылын оҕолоро, Төрөөбүт тыл уонна сурук-бичик күнүн көрсө, олунньу 12 күнүгэр Дьокуускайга П.А. Ойуунускай аатынан литературнай музейга үрдүк таһымнаах тэрээһиҥҥэ кытыннылар. Сарсыарда 9 чаастан саҕалаан, күнүс 4 чааска диэри тигинэччи үлэлээн дуоһуйдулар.
Ол курдук, Россия уонна Саха сирин үтүөлээх тренерэ Сергей Давыдович Чугунов араас бөрүөлэри (перо) муспут коллекциятын сэҥээрэн көрдүлэр. Былыргы оҕолор курдук, бөрүөнэн суруйан үөрдүлэр.
Музей үлэһитэ, суруйааччы Николай Егорович Винокуров-Урсун экскурсия оҥордо. Олус интэриэһинэй кэпсээнин сэргээн иһиттилэр, ыйытыылары биэрдилэр.
СӨ норуодунай артыыһа Дмитрий Егорович Артемьев кэлэн, Сергей Зверев-Кыыл Уола «Оһуор үҥкүүтүн» хамсаныыларын үөрэттэ. «Бэрт Хара» олоҥхоттон быһа тардан, олус сэргэхтик толорон, оҕолору уран тыл умсулҕаныгар угуйда. Хомусчуттарга сүбэ-ама биэрдэ.
Түмүгэр илии-илииттэн тутуһан, тоҥолохтон тутуһан, саха оһуокайын тардан кэбистилэр. Дмитрий Егоровичка махтал тылларын анаатылар.
Музей үлэһитэ Ньургуйаана Халгаева, аныгы виртуальнай технологияны туһанан, квадрокоптеры көтүтэн устубут киинэлэрин көрдөрдө, П.А. Слепцов-Ойуунускай төрөөбүт-үөскээбит, сүүрбүт-көппүт алаастарынан “көччүттэ”, политсыылка музейын устун “күүлэйдэттэ”.
Дьэ, онтон кэтэһиилээх-күүтүүлээх «ZAVOD» бөлөх Серго уонна Илья диэн уолаттара кэлэн, аныгылыы эрчимнээх үҥкүүгэ маастар-кылаас биэрдилэр. Оҕолор кылгас кэм иһигэр кинилэрдиин тэбис-тэҥҥэ үҥкүүлээтилэр.
Габышева Уйгулаана, VI кылаас үөрэнээччитэ, үҥкүү куттаах кыыс. «ZAVOD»-тартан хаалсыбакка хамсанна. Олус дьоллоох, үөрүүлээх түгэн манна тосхойдо, ыра санаалара туолла.
Онтон Төрөөбүт тыл уонна сурук-бичик күнүнэн, Сэмэн Андреевич Ноҕуруодап алпаабытынан дьыктаан суруйа, 50-ча киһи музейга муһунна.
Сурук үлэтин иннинэ «Хомус алыба» ансаамбыл оҕолоро эҕэрдэ нүөмэрдэрин көрдөрөн, сахалыы суруйарга ураты эйгэни олохтоотулар, турукка киллэрдилэр.
Бу курдук үтүө күнү оҕолорго бэлэхтээбит П.А. Ойуунускай аатынан музей бары үлэһиттэригэр, чуолаан дириэктэри солбуйааччы Линда Николаевна Ивановаҕа, Ньургуйаана Халгаеваҕа, Ангелина Кузьминаҕа барҕа махталбытын тиэрдэбит.
Варвара Ефимова,
«Хомус алыба» ансаамбыл салайааччыта.