Бу дьыл алтынньы 1 күнүгэр Дьокуускайдааҕы сибээс уонна энергетика кэллиэһигэр өрөспүүбүлүкэҕэ бастакы «Яндекс.Лицей» үөрэтэр былаһаакканы арыйыы сиэрэ-туома буолла. «Яндекс.Лицей»диэн 8-9 кылаас оҕолорун программирование тылларыгар төлөбүрэ суох үөрэтэр икки сыллаах бырайыак буолар.
Кэллиэс дириэктэрэ Гаврил Семенов: “300 оҕоттон 15 оҕо талыллан, бүгүҥҥүттэн үөрэхтэрин саҕалаатылар. Үөрэтии түмүгүнэн үөрэнээччи Яндекс киинигэр үөрэммитин туһунан сертификат ылыаҕа. Уонна, сүрүнэ, IT – хампааанньалар билинэр Junior-программист аатын сүгэр чиэскэ тиксиэ. Яндекс.лицейга үлэлииргэ сүүмэрдээһин учууталлар ортолоругар эмиэ ыытылынна. Аныгыс сылга 30 үөрэнээччини ылан, үлэбитин кэҥэтэр былааннаахпыт. Биһиги кэллиэспит үөрэҕирии эйгэтигэр инновация киинэ буоларын туһугар үлэлиибит”,- диэн кэпсээтэ.
Үөрэх уонна наука миниистирэ Михаил Сивцев бэлиэтээбитинэн, «Яндекс.Лицей» былаһаакка «Цифровая экономика Российской Федерации» национальнай бырагыраама «Кадры для цифровой экономики» диэн федеральнай бырайыак биир тэрээһининэн буолар уонна «Образование» национальнай бырайыак чэрчитинэн олоххо киирэр.
“Дьокуускайдааҕы сибээс уонна энергетика кэллиэһэ дойду үөрэҕин тэрилтэлэрин ортотугар сүүмэрдээһини ситиһиилээхтик ааһан, өрөспүүбүлүкэҕэ бастакынан «Яндекс.Лицей» үөрэтэр былаһаакканы аста. Билигин цифровизация аан дойдуга саҥа экономика олугунан буолар, ол иһин бу хайысханы сайыннарар биһиги сүрүн сорукпутунан буолуохтаах. «Яндекс.Лицей» үөрэнээччилэрэ аан дойду аныгы ырыынагар наадалаах сатабылы, үөрүйэҕи ылыныахтаахтар”,- диэтэ миниистир.
«Яндекс.Лицей» преподавателэ Дмитрий Никифоров кэллиэскэ үс сыл үлэлээбит уопуттаах буолан, билигин бэйэтин кыаҕын саҥа сонун сүүрээҥҥэ боруобалыыр санаалаах. «Учууталларга аналлаах куурустар пандемиянан сибээстээн, дистанционнай ньыманан барбыттара , ол эрээри барытын толору үөрэнэн, билиибитин хаҥаппыппыт. Оҕолортон кыахтаах оҕолору талбыппын, онон үөрэҕи үчүгэйдик ылыныахтара диэн эрэллээхпит.Билигин миэхэ, учуутал буоларым быһыытынан, саамай сүрүнэ, оҕолору IT уустук эйгэтинэн интэриэһиргэтэн, бу кинилэр олохторун дьыалатынан буоларын ситиһии буолар», — диэн санаатын үллэһиннэ.
Эҕэрдэ тыллары СӨ инновация, цифровой сайдыы уонна инфокоммуникационнай технологиялар министиэристибэлэрин миниистирин солбуйааччы Петр Николаев уонна ПАО «ВТБ БАНК» бэрэстэбиитэлэ Екатерина Соколова эттилэр.
Keskil14.ru
Петр Матвеев түһэриилэрэ