Чыамайыкы оскуолатын оҕолоро «Дойдубут туһугар — бары бииргэ» диэн девизтээх 66-с төгүлүн ыытыллар В.К. Степанов аатынан культура уонна спорт эстафетатын күрэҕэр кытыннылар. Оскуола үөрэнээччилэрэ уонна уһуйаан иитиллээччилэрэ фестивальга нэһилиэк чиэһин көмүскээтибит.
Настя Романова, VII кылаас:
— Оскуолабыт оҕолоро, ким да хаалсыбакка, улаханныын-кыралыын бары кыттыбыппыт. Ким ыллаан, ким үҥкүүлээн, сорох олоҥхолоон. Кэнсиэргэ 8 нүөмэри туруордубут. Уһуйаан кып-кыра оҕолоро араас инструменнарга оонньоон, соһуттулар. Алын кылаас оҕолоро чабырҕахтаатылар. Сыанаҕа тахсаары туран, бары долгуйбуппут ахан. Хата үчүгэйдик ааспыта, оҕолор мичээрдээн, үөрэн-көтөн тахсыбыппыт.
Алгыстаан Максимов, IX кылаас:
— Кэнсиэргэ оһуохай эппитим. Оһуохайы үс көлүөнэ эппитэ: оҕо, ыччат уонна кырдьаҕас көлүөнэ. Мин эдэр көлүөнэ аатыттан мэҥэлии оһуохайдаабытым, ыччаттартан Айтал Макаров, кырдьаҕас көлүөнэ аатыттан П.Е. Семенов эппитэ. Оһуохайбытыгар барыта 80-тан тахса киһи кыттыбыта. Оһуохайы эппит дьон жюрилартан элбэх хайҕабыл ыллыбыт уонна нэһилиэкпитигэр баал биэрдибит.
Кэнсиэр дипломаннарынан хомусчуттар ансаамбыллара (сал. Д.Г. Максимова), чабырҕахсыттар бөлөхтөрө (сал. Л.Б. Иванова), олоҥхоһуттар (сал. А.П. Созонова), уһуйаан фольклорнай композицията ( сал. А.К. Дьячковская) буоллулар. Лауреат үрдүк аатын «Үрүйэчээн» үҥкүү бөлөҕө (сал. А.П. Жиркова), уолаттар уус-уран ааҕыылара (сал. Т.Р. Алексеева, А.П. Филиппова), уһуйаан иитиллээччитэ Алдар Федоров олоҥхото (сал. А.К. Дьячковская) ыллылар. Кэнсиэр уопсай баала 4,16 буолла.
Саша Романова, Х кылаас:
— Спортка «Өбүгэ оонньууларыгар» 11 оҕо (5 кыыс, 6 уол) кыттыбыта . Күрэх көрүҥнэрэ: ойбонтон уулааһын, биэс төгүл куобах, тутум эргиир, суоска тэбиитэ, көтөх ынаҕы туруоруу, хабылык, хаамыска. Бары үчүгэйдик дьарыктанан, үрдүк ситиһиилэри көрдөрбүттэрэ. Оҕолорбутугар, тренердэргэ улахан махтал.
Лиза Фомина, VII кылаас:
— Быыстапкаҕа нэһилиэк уонна оскуола оҕолоро кыттыбыппыт. Уопсайа, 41 үөрэнээччи 49 үлэнэн кыттыбыта. Х кылаас үөрэнээччитэ Сайаана Захарова дьүүллүүр сүбэҕэ үлэлэри билиһиннэрбитэ. Быыстапка баала 4,00 буолбута. Элбэх оҕо дипломант, лауреат үрдүк аатын ылары ситистибит.
«Проба пера» эдкорпост.
Чыамайыкы, Мэҥэ-Хаҥалас.