Бу кэлбит ыарыы, хомойуох иһин, намтаабакка, үөрэх кыһалара син биир дистанционнай ньыманан улэлии тураллар. Коронавирус дьаҥа турар кэмигэр түбэспит эдэр көлүөнэ ыччакка буолуой? Бу ыйытыыга хоруйдары ааҕыҥ.
Надежда Марковна Борисова, ХИФУ преподавателя:
— Билии хайдах бэриллибитинэн сыаналаммат дии саныыбын. Билии оҕо төһө өйдөөн хаалбытын хаачыстыбатыгар буоллаҕа. Ол үөрэнээччи эбэтэр устудьуон тус бэйэтин дьоҕуруттан тутулуктаах буолуон сөп. Оттон дистанционнай үөрэх, мин санаабар, оҕо бэйэтэ сааhыланарыгар, хасыhан үөрэнэр дьоҕурун сайыннарарыгар өссө көмөлөһөр кыахтаах.
Анисия Лебедева, ыал ийэтэ:
— Оҕо бэйэтэ кыһаллан үөрэммит буоллаҕына, туһалыа. Уонна, холобур, устудьуон, ханнык идэни таларыттан эмиэ тутулуктаах. Кыһаллан бэлэмнэнэр оҕоҕо барыта табыллыа.
Маргарита Иванова, медицинэ кэллиэһин устудьуона:
— Мин дистанционнай үөрэҕи оҕо үчүгэйдик ылыммат дии саныыбын, тоҕо диэтэххэ, оҕо болҕомтолоохтук истэн олорбот, камератын арааран баран, төлөпүөҥҥэ оонньуунан арылдьайан хаалар. Оскуолаҕа учууталы истэн олорон үөрэнэр быдан туһалаах буоллаҕа.
Ньургун Григорьев, ХИФУ устудьуона:
— Дистанционнай ньыманан үөрэнэр оҕо үөрэх кыһатыгар ылар билиитинээҕэр аҕыйаҕы ылар. Оскуолаҕа учуутал барытын үчүгэйдик көрдөрөн-быһааран биэрэр. Ол эрээри онлайн олорон үөрэнэр оҕо бэйэтиттэн кыһамньытыттан, сорудаҕы барытын толороруттан, учууталы болҕойон истэриттэн тутулуктаах.
Ааптар: Валентина Суздалова