Хаҥалас улууһун Өктөм нэһилиэгэр Лена Анатольевна, Артем Николаевич Петровтар үс сибэкки кыыстаах эдэр ыал олороллор.
Кинилэр “Дьиэ кэргэнинэн дьиэҕэ олор” диэн Өктөмнөөҕү Култуура киинэ көҕүлээбит хаартысканан куонкуруһугар иккис бочуоттаах миэстэҕэ тигистилэр.
—Бу күннэргэ дьиэҕэ олорон, оҕолорбун, кэргэммин кытта бииргэ бириэмэни атааран, ирэ-хоро кэпсэтэн, оонньоон, олус үчүгэй,—диир ийэлэрэ Лена Анатольевна. –Арай кэлбэт-барбат буолуу, хааччахтаһын атахтаабыта буолуо. Чэ, ол туох буолуой, сүрүнэ, бары бииргэ бу күннэри атаардыбыт, ким да тус дьарыгыттан, үлэтиттэн хаалбата.
Ыал улахан оҕото, Полина, Өктөмнөөҕү үөрэх-билим киинигэр V кылааһы ситиһиилээхтик бүтэрэн эрэр. Хореография, ырыа, тыйаатыр дьарыктарыгар уһуйуллар, уруһуйдуурун сөбүлүүр. Дьоно “Кэскил” хаһыаты суруйтарар буолан, иллэҥ кэмигэр хаһыатын көрөр, ааҕар. Аҕыйахтык да буоллар, “Кэскилгэ” бэчээттэммит. Туох эрэ интэриэһинэйи, сонуну биллэҕинэ, көрдөҕүнэ, таптыыр хаһыатыгар суруйуон саныыр.
Орто кыыс Олеся — “Мичээр” биэбэйик бэлэмнэнии бөлөҕүн иитиллээччитэ. Скрипка бэлэмнэнии кылааһыгар нэдиэлэҕэ иккитэ үөрэнэр, уруһуйдуурун, пластилинынан оҥорорун сөбүлүүр.
Петровтар мурун бүөтэ, кырачаан кыыстара Наина — эмиэ “Мичээр” биэбэйик кыраларын бөлөҕүн иитиллээччитэ. Эдьиийдэрин курдук, уруһуйдуурун сөбүлүүр. Дьиэҕэ олорон, биэбэйик сорудаҕын, “тук” курдук, кэмигэр толоро иһэр кыһамньылаах дьоһун киһи.
Эдэр ыал былырыын саҥа дьиэ туттан киирбиттэр. Онон сааскы халлаан анныгар бэйэлэрин тиэргэннэригэр таһырдьа сылдьан абыраммыттар.
Бу күннэргэ кыргыттар “Астыы үөрэнэбит” “Бичик” кинигэ кыһатын кинигэнэн ас астаан, түбүгүрбүттэр.
Бу күннэргэ Петровтар оҕолорго аналлаах “Кэскил” хаһыакка, “Чуораанчык” сурунаалга суруйтарар былааннаахтар.
Ааптар: Жанна Леонтьева