Биһиги нэһилиэкпитигэр «Экстра Синема» киинэ театра үлэҕэ киирэн, нэһилиэк олохтоохторугар улахан сэргэхсийии буолла. Ол курдук алтынньы 19 күнүгэр Михаил Лукачевскай саҥа тахсыбыт «Триумф» киинэтин улахан экраҥҥа көрдүбүт.
Киинэ дириҥ ис хоһоонноох. Киһини өй-санаа өттүнэн иитэр суолталаах.
Мин бу киинэҕэ эдэркээн уолу Сахааччаны олус аһынным. Эдэр сааһыгар былдьаммытыттан киһи уйадыйар. Бараары туран ийэтин кытта быраһаайдаһара көрөөччүнү долгутта.
Павел Пинигин күүстээх санаатыттан сөхтүм. Кини баҕа санаата күүстээҕин соһуйа да, долгуйа да көрдүм. Тоҕо диэтэххэ, Байбал ийэтэ улахан ыарыыттан күн сириттэн күрэнэн аҕата уолун бэйэтэ иитэр. Ону тэҥэ тренердэрэ Дмитрий Петрович Коркин төһө да ыарыыга ылларан сырыттар, күүстээх санаата кыайан, төһө күүһэ тиийэринэн уолаттарын кыайыыга сирдиир. Кинилэри тулуурдаах, күүстээх санаалаах, сыал-сорук туруорунарга, бэрээдэккэ үөрэтэр.
Мин бу киинэҕэ дьиҥнээх тренер диэн кимин, тугун биллим. Дмитрий Петрович Коркин курдук тренер сахаларга аҕыйаҕа буолуо дии санаатым.
Киинэ кэнниттэн көрөөччүлэртэн санааларын үллэстэллэригэр көрдөстүм.
Мотрена Иннокентьевна Владимирова:
– Бүгүн «Триумф» киинэни көрөн олус диэн астынныбыт. Сахаачча оруолун биир дойдулаахпыт Александр Кузьмин бэркэ оонньоото. Ыарахан оруолу толорбут. Сахааччаны аһыйан харахпыт уута саккырыы олордо. Аммалар биир дойдулаахпыт Ньургуйаана Шадрина күн сириттэн күрэнэр ыарыһах ийэ оруолун оонньоон, бары да хараастан ыллыбыт. Ийэ оруолун олус итэҕэтиилээхтик толордо. Хас биирдии ийэ оҕотугар инники олоҕор олус туһалаах бэргэн этиини этэрэ олус үчүгэйдик көһүннэ. Киинэҕэ оонньообут артыыстарга махтанабыт.
***
Ульяна Устиновна Захарова:
– «Триумф» киинэҕэ урукку биһиги саҕанааҕы кэм көстөр буолан, олус чугастык ылынным. Сахалар улуу тренербит Дмитрий Петрович Коркин хайдах курдук оҕолору бэриниилээхтик дьарыктыырын көрөн сөхтүбүт. Уолаттара Олимп чыпчаалыгар тахсалларыгар Коркин өҥөтө олус элбэх. Артыыстар оруолларын ис-истэриттэн арыллан, олус иэйиилээхтик оонньообуттарыттан көрөөччүлэр улаханнык астынныбыт. Саамай сөбүлээн көрбүтүм диэн Сахаачча оруолун толорбут Александр Кузмин. Ыарахан оруолу оруобуна толордо диэн этиэхпин баҕарабын. «Триумф» киинэни оҥорон таһаарбыт хамаандаҕа махтанабыт.
Эрчим НИКОЛАЕВ, IX кылаас,
В.М. Новиков-Күннүк Уурастыырап аатынан Эмис орто оскуолата, Амма