Быйыл биһиги оскуолабыт маҥнайгы кылааһыгар 6 оҕо киирдэ. Балаҕан ыйын бастакы күнүгэр оҕолордуун, учууталлардыын «Дьөһүөл» бырагырааманан оскуолаҕа бары сахалыы таҥаһы кэтэн симэнэн кэллилэр!
Оҕолору уһуйаан иитээччитэ Сахаайа Артемьевна Санникова атааран, бастакы учууталлара Алена Михайловна Сергучева оскуолаҕа сиэтэн киллэрдэ.
Төрөппүт сэбиэтин бэрэссэдээтэлэ, сэттэ оҕолоох ийэ Саргылаана Афанасьевна Андреева сыт таһааран, алгыстаах алаадьынан оҕолору күндүлээтэ.
Онтон биһиги, 11 кылаастар, быйыл — оскуоланы бүтэрэр сылбыт. Үөрэхпит тиһэх сыллара бу коронавируһунан сибээстээн, уустуктардаах буолла. Пандемиянан сылтаан, үөрэхпит онлайн ыытыллар буолбута үөрэх эйгэтигэр, чуолаан үөрэнээччилэргэ, улахан хоромньуну оҥордо. Мин санаабар, оҕолор тэйиччи ньыманан үөрэнэллэриттэн сылтаан, билиилэрин таһыма намтаата.
Оскуола паартатыгар олорон, учуутал саҥа тиэмэни быһаарарын илэ истэн-көрөн үөрэнэрбит быдан туһалаах. Мин бэйэм оскуолаҕа үөрэнэрбин ордоробун, тоҕо диэтэххэ, оччоҕо үөрэтэллэрин түргэнник ылынабын, өйдүүбүн. Ол иһин бу үөрэх дьылыгар оскуолаҕа кэлэн үөрэнии хаһан көҥүллэнэрин наһаа күүтэбин.
Быйыл оскуоланы бүтэрэр сылбыт буолан, профориентация туһунан элбэх информацияны, сүбэни-аманы биэрэллэригэр наһаа наадыйабыт. Бэйэм юрист буолуохпун баҕарабын, ол иһин үрдүк үөрэххэ туттарсабын. Бу сылга история уонна обществознание бэридимиэттэригэр үчүгэйдик дьарыктаныахпын наада. Ону таһынан нуучча тылыгар уонна математикаҕа кыһаллыам. Бу сыл уонна кэлэр 2021 сыл мин олохпор улахан оруолу оонньууллар дии саныыбын..
Оскуолабыт, уруккутун курдук, оҕолорго аанын тэлэччи аһан, элбэх тэрээһини, күрэхтэһиини, куонкуруһу ыытан, умнуллубат кэмнэри, дьоро киэһэлэри бэлэхтииригэр баҕарабын. Быйыл оскуоланы бүтэрээччилэргэ – араас таһымнаах кэмпириэнсийэлэргэ уонна олимпиадаларга үрдүк ситиһиилэри!

Төрөппүт Саргылаана Андреева, учуутал Екатерина Попова “Кэскили” батыһыым – киэҥи көрүүм» стендэ аттыгар.
Ааптар: Даша Омукова, 11 кылаас. «Бэдьимэ кэскилэ» пост.
Мэҥэ Хаҥалас.