Саха норуотун уус-уран айымньыта олоҥхо. Сунтаар улууһа олоҥхо дойдутунан биллэр. Сунтаартан биллэр көстөр олоҥхоһуттар бааллар.
Сунтаарга Күүкэй нэһилиэгэр сылын аайы тэриллэр «Олоҥхо Дойдутун оҕотобун» диэн лааҕыр үлэлиир. Быйылгы лааҕырбыт бэс ыйын 15 күнүттэн үлэлии турар. Биһиги олоҥхону, тойугу, ырыаны, хоһоону, чабырҕаҕы үөрэтэбит. Уһуйааччыбыт Сааскылаана Альбертовна Ильина, кини олоҥхоһут, уһуйааччы Никандр Прокопьевич Тимофеев үөрэнээччитэ буолар.
Лааҕырга Сунтаар улууһуттан Бордоҥтон, Дьаархаантан, Күүкэйтэн, Сунтаартан, Кутанаттан оҕолор кэлэн сылдьаллар. Оҕолор икки хамаандаҕа арахсан лааҕыр көхтөөх олоҕор кыттабыт.
Лааҕырбытыгар элбэх тэрээһиннэр буолаллар. «Кыыс Куо» уонна «Үрүҥ Уолан» күрэхтэр, олоҥхо дойдутун үс араас дойдутун: абааһы, орто, үөһээ дойдулар тустарынан, аныгылыы квест оонньуу уо.д.а. ыытыллыбыттара.
Иитээччибит Аэлита Семеновна Герасимова эйэҕэс, барыбытыгар сүбэ-ама, көмө буолар. Күннэтэ минньигэс астаах поварбыт Вера Кимовна Кривошапкина буолар. Биһигини эмтиир, доруобуйабытын көрөр медикпыт Акулина Андреевна Гоголева.
Дьарыктанан, сибиэһэй салгыҥҥа оонньоон баран киэһэ ахсын бука бары киинэ көрөбүт эбэтэр сахалыы остуол оонньууларын оонньуубут.
Лааҕыр олоҕо интэриэһинэй, саҥаны билэҕин, көрөҕүн, үөрэтэҕин, саҥа оҕолору кытта билсэҕин, сайыҥҥы бириэмэни туһалаахтык атаараҕын. Эһиил сайын лааҕыр тэрилиннэҕинэ эмиэ сылдьар баҕа санаалаахпын. Лааҕырым оҕолоругар, үлэһиттэригэр баҕарыам этэ доруобуйаны, ситиһиини!
Сулустаана ФЕДОРОВА,
Күүкэй орто оскуолатын 8 кылааһын үөрэнээччитэ.
Сунтаар улууһа, Күүкэй.