Олунньу 6 күнүгэр Аммабыт нэһилиэгэр бэлиэ тэрээһин буолла. Ол курдук, саха литературата төрүттэммитэ 125 сылын арыйан, Өксөкүлээх Өлөксөй төрөөбүт Уучай алааһыгар сүгүрүйүү сиэрэ-туома ыытылынна.
Ол кэнниттэн ыалдьыттар С.Р.Кулачиков-Эллэй аатынан Чычымах орто оскуолатыгар Амма нэһилиэгин дьонун-сэргэтин кытта көрүстүлэр. Бу үөрүүлээх тэрээһиҥҥэ Өксөкүлээх Өлөксөй сиэнэ Кулаковская-Велисавлевич Лариса Реасовна, хос сиэнэ Кулаковская Варвара Атосовна, Саха сирин Суруйааччыларын сойууһун бэрэссэдээтэлэ, «Чолбон» сурунаал бас эрэдээктэрэ Андросов Г.Г., Ил Түмэн депутата, «Барҕарыы» национальнай фонда салайааччыта Постников А.В., С.Р. Суруналыыстарын сойууһун чилиэнэ, суруйааччы, «Чолбон» сурунаал эрэдээктэрэ Макеев Д.П., СӨ суруйааччыларын сойууһун бэрэссэдээтэлин эбээһинэһин толорооччу Доллонов В.С., Чөркөөхтөөҕү политсыльнай музей дириэктэрэ Протодьяконов М.А., улуустааҕы норуот айымньытын дьиэтин дириэктэрэ Вырдылин Г.Г., Россия суруйааччыларын сойууһун чилиэнэ, драматург Утум Захаров, улуустааҕы, «Таатта» хаһыат редактора, дириэктэрэ Посельская А.К., «Амма нэһилиэгэ» ТСТ баһылыга Старостин С.П., Чычымах олохтоохторо уонна оскуола үөрэнээччилэрэ кыттыыны ыллылар.
Ыалдьыттарбыт биһигини, оскуола оҕолорун кытта кэпсэтии ыыттылар. Бары олус үчүгэйдик сахалыы уус-ураннык саҥараллара киһини сөхтөрөр уонна биһиэхэ холобур буолар. Кэпсэтии түмүгэр, биһиги, эдэр ыччат, саха омук инники көлүөнэтэ буолабыт. Онон, Сахабыт сиринэн киэн туттуохтаахпыт уонна тылбытын умнуо суохтаахпыт диэн түмүккэ кэллибит. Кырдьык, сахабыт тыла сүппэтин туһугар хас биирдиибит кыра да буоллар кылаатын киллэриэхтээх. Оҕолорбутун, сиэннэрбитин сахалыы ыраастык саҥарарга үөрэтиэхтээхпит.
Лиза КАНАЕВА,
X кылаас,
Чычымах, Таатта