Ыам ыйын күнэ 9 – Кыйыы Күнэ! Өрөгөйдөөх кыайыы парада Чурапчы сэлиэнньэтигэр үрдүк таһымҥа ааста. Сарсыардаттан бу Үбүлүөйдээх Улуу Кыайыы 80 сылын үөрэ-көтө көрсүҥ диэбиттии, чээлэй күөх халлааммытыгар күммүт чаҕылыччы тыган киһи сүргэтин көтөхпүтэ. Хас биирдии киһи бу эппиэтинэстээх тэрээһиҥҥэ дууһатын ууран туран кыһаллыбыта тутатына биллэр.
Быйыл олус элбэх дьон «Өлбөт үйэлээх полк» акцияҕа кыттан эбэлэрин, эһэлэрин мөссүөннэрин тутан «Боотур Уус» стадионҥа үктэммиттэрэ. Парад үөрүүлээх чааһын, трибунаны биир гына, улаханныын-кыралыын, тобус толору олорон астыбыт. Ветераннары, сэрии оҕолорун, көһөрүллүү кыттыылаахтарын эҕэрдэлээһин, анал байыннай дьайыы кыттыылаахтарын чиэстээһин сиэрэ-туома олус долгутуулаах этэ. Кыайыыга кынаттаабыт ырыалар ылламмыттара, кып-кырасыабай 80 пара үҥкүүлээн тэлээрбиттэрэ, ВПК «Беркут» иитиллээчилэрин толорууларын сөҕөн-махтайан көрдүбүт. Парады Чурапчы сэлиэнньэтин түөрт оскуолатын үөрэнээччилэрин уонна учууталларын, 2000 тахса киһилээх «Кыайыы хора» киэргэппитэ. Хор салайааччыта, С.А.Новгородов аатынан Чурапчы орто оскуолатын, музыкаҕа учуутала – Игнатьева Галина Николаевна.
Улуу Кыайыы 80 сылыгар анаммыт тэрилтэлэр икки ардыларыгар хамаандынай эстафетаҕа биһиги, С.А.Новгородов аатынан оскуолабыт коллектива, быһый атахтаахтара, бастакы миэстэ буоланнар кыайыы өрөгөйүн билбиттэрэ. Убаастыыр учууталларбар ис сүрэхпиттэн эҕэрдэбин тиэрдэбин!
Араас хайысханан тэрээһиннэр олус чаҕылхайдык аастылар, астымматах, дуоһуйбатах киһи диэн суоҕа буолуо дии саныыбын.
Биһиги, эдэр кэнэҕэски ыччат, Аҕа дойду сэриитин кыттыылаахтарын сырдык кэриэстэригэр, дьоруойдуу охтубут эһээлэрбит, эбээлэрбит тустарыгар ырааска, сырдыкка эрэ дьулуһуохтаахпыт. Дойдубут историятын билиэхтээхпит, үөрэтиэхтээхпит, умнуо суохтаахпыт. Иннин диэки сайда-үүнэ туруоххайыҥ, дойдубутун таптыахайын! Туругурдун, иллээх олох! Туругурдун, Эйэ!
С.А.Новгородов аатынан 10 кылаас үөрэнээччитэ,
Макарова Арианна