Хотугулуу-Илиҥҥи федеральнай үнүбүрсүтүөккэ «Чинчийэбит уонна бырайыактыыбыт» («Исследуем и проектируем») үөрэнээччилэр бүтүн Арассыыйатааҕы куонкурустарын түмүктүүр түһүмэҕэ саҕаланна. Күрэх түмүгүнэн үрдүк үөрэх кыһатыгар туттарсааччыларга: кыайыылаахтарга — сэттэ, оттон призердарга — биэс балл эбиллиэҕэ. Бу туһунан үнүбүрсүтүөт пресс-сулууспата иһитиннэрэр.
Быйыл «Чинчийэбит уонна бырайыактыыбыт» («Исследуем и проектируем») куонкурус онус сылын ыытыллар.
«Куонкурус федеральнай таһымнаммыта олус үчүгэй. Бу бырагыраамата кэҥииригэр уонна кыттааччы ахсаана элбииригэр кыах биэрэр. Билигин өрөспүүбүлүкэ таһыгар тахсаммыт, ХИФУ лисиэйин үөрэнээччилэрэ атын эрэгийиэн үөрэнээччилэрин кытта күрэхтэһэр кыахтаннылар», — диэн этэр ХИФУ ректора Анатолий Николаев.
Түмүктүүр түһүмэххэ уопсайа 96 үөрэнээччи кыттар. Кинилэр үс треккэ күрэхтэһиэхтэрэ: конференция, олимпиада уонна түөрт хайысханан кейс-турнир: физика уонна техническэй наукалар, математика уонна программирование, биология уонна география, химия уонна химическэй технология. Тэрээһин ахсынньы 9 күнүгэр диэри ыытыллар. Түмүк икки лиганан тахсыаҕа: юниордар (8-9 кылаастар) уонна үрдүкү 10-11 кылаастар.