Дьааҥы улууһун Боронук орто оскуолатыгар Саха Өрөспүүбүлүкэтин судаарыстыбаннаһын күнүгэр элбэх тэрээһин ыытылынна. Саха АССР төрүттэммитэ 100 сылыгар аналлаах саха суруйааччыларын айымньыларынан хартыынаны тыыннааҕымсытан көрдөрүү буолла, аныгылыы эттэххэ — косплей. 1 кылаас үөрэнээччилэриттэн 11-тэргэ диэри бары көхтөөхтүк кытыннылар.
3 кылаас үөрэнээччитэ Айтал Сыромятников С. Данилов «Торбостор» кэпсээнин көрдөрдө: Манчаары оҕо сылдьарын, отторо бүтэн, торбосторо аччыктыылларын. Кылаас сал. Екатерина Афанасьевна Слепцова.
5 кылаастар (кылаас сал. Луара Юрьевна Заборовская) Т. Сметанин «Күөрэгэй» остуоруйатын арыйдылар, Олоо уол — Яша Слепцов, Маачаха ийэ — Сашенька Другина, Күөрэгэй — Аиза Тарабукина.
6 кылаас (кылаас сал. Александра Яковлевна Горохова) олоҥхоттон быһа тардыыны көрдөрдө, Айталы Куо — Глория Другина, Абааһы — Күннэй Андреева.
Онтон бу Эрилик Эристиин «Хачыгыр» кэпсээнэ, оруолларга: Кэччэгэй Кэтириис — Арияна Другина, Хачыгыр — Данил Горохов.
Бу хаартыскаҕа Алампа «Куоратчыт» кэпсээниттэн хаартыһыттар киирсиилэрин көрөҕүт.
Н. Заболоцкай «Сайылыкка» кэпсээниттэн быһа тардыы. Кылаас салайааччыта Галина Вячеславовна Горохова.
Сэттистэр (кылаас сал. Мирослава Константиновна Горохова) Амма Аччыгыйа «Сааскы кэм» романыттан «Мөссүйүөҥҥэ» кэпсээнин косплейынан арыйдылар.
9 кылаастар «Биэс ынахтаах Бэйбэрикээн эмээхсин» остуоруйаны олус үчүгэйдик арыйдылар.
Бу курдук сонуннук уонна чаҕылхайдык оҕолору саха литературатын айымньыларын, үөрэтэр бырагыраамаларын кытары билиһиннэриэххэ сөп. Маладьыастар!
keskil14.ru