2009 сыллаахха балаҕан ыйын 1 күнүгэр суумка сүгэһэрдээх, улахан баанчыктаах, маҥан фартуктаах кырачаан кыыс оскуола боруогун аан бастаан атыллаан киирбитим номнуо 11 сыл ааһа охсубут.
Бастакы учууталбытынан наһаа элэккэй, истиҥ санаалаах, бастыҥ мааны майгылаах Александра Ивановна Антонова буолбута. Кини биһигини тылы тылга холбоон ааҕарга, өйгө суоттуурга, ыраастык, тупсаҕайдык суруйарга үөрэтэн, элбэх билиини биэрбитэ. Учууталбыт барахсан төһөлөөх элбэх сыратын-сылбатын ылбыппыт буолуой?.. Оҕо аан бастаан ылбыт билиитин эбинэн сайдан тахсара чахчы. Ол курдук, учууталбыт биһигини барытыгар үөрэппитэ — ыллыырга, үҥкүүлүүргэ, чабырҕахтыырга, тойуктуурга, оһуокайы таһаарарга .
5-с кылааска нуучча тылын учуутала Надежда Трофимовна Васильева сиэтэлээн киллэрбитэ. Биһигини нууччалыы ыраастык саҥарарга, кэтэмэҕэйдээбэккэ кэпсииргэ үөрэппитэ. Онтон 6-с кылааска эдэр историк учуутал, Айсен Ахметович Дмитриев, ылан, тэбис-тэҥҥэ сылдьыһан, иннибит диэки хаампыппыт. Орой мэник оҕо сааспытыгар сылдьар оҕолору 8-с кылааска Евдокия Анатольевна Колтунова ылбыта. Кини улуу нуучча классиктарын үөрэппитэ уонна биһигини барытыгар бэйэбит кыттарбытын, оҥорорбутун ирдиирэ. Кырдьык, бэйэбитин бэйэбит салайынар буолбуппут кэлин туһалыаҕа дии саныыбын.
Дьэ, саамай эппиэттээх, түбүктээх, БКЭ-лээх кэммитигэр, 11-с кылааска, аламаҕай, аһыныгас санаалаах Вера Семеновна Васильева кылаас салайааччытын анаммыта. Туох баар үөрэппит учууталларбар барҕа махтал тылларын аныыбын, кинилэри өйдүүбүн, саныыбын, ахтабын.
Бу быйылгы сыл биһиэхэ хаһан да умнуллубат буолла. Аан дойдуну тилийэ сүүрбүт коронавирус пандемията туран, төрдүс чиэппэри дистанционнай үөрэҕинэн түмүктээн эрэбит. Бүтэһик чуораан, аттестат ылар үөрүүлээх күммүт уонна банкет буолбатыттан наһаа хомойобут. Ол да буоллар, үөрэхтээх дьон буолаары, биир кэлим эксээмэннэрбитин ситиһиилээхтик туттарыахпыт уонна баҕалаах үөрэхпитигэр киириэхпит диэн эрэнэ саныыбын.
Оскуолаҕа үөрэнэрим таһынан, кыра сааспыттан дуобатынан, фольклорунан дьарыктанан кэллим. Оскуола, оройуон, өрөспүүбүлүкэ араас таһымнаах күрэхтэргэ миэстэлэһэн, тренерим Василий Иванович Кононов аатын ааттата сылдьабын. Фольклор араас көрүҥнэригэр эмиэ олох кырабыттан Альбина Дмитриевна Платоноваҕа үөрэнэн, күрэхтэргэ кыттан, миэстэлэһэн, үөрүүбүт баһаам. «Ай-тут» муода тыйаатырыгар Иринада Николаевна Ефремова сыанаҕа хайдах тутта-хапта сылдьарга, кыыс хайдах буолуохтааҕын, хайдах көрүнүөхтээҕин, хайдах таҥас барсарын үөрэттэ. Нэһилиэк «Күн сарыала» хаһыатыгар эдэр кэрэспэдьиэнинэн үлэлээтим. Онон мин бары өттүнэн дьарыктаах уонна дьоҕурдаах буолан, оскуолабын ситиһиилээхтик бүтэрэн эрэрбиттэн үөрэбин.
«Ким доҕордоох, ол дьоллоох» диэн өс хоһооно дьиҥнээҕин көрдөрбүт бииргэ үөрэммит оҕолорбор эмиэ махтанабын. Оонньоон-көрүлээн, 11сыл тухары оскуолаҕа үөрэнэ сылдьыбыт кэмнэрбитин өрүү өйдүү-саныы сылдьыахпыт.
Оскуолам барахсан үүнэ-сайда, чэчирии тураргар баҕарабын. Элбэх оҕону олох киэҥ аартыгар кынаттаа! Оскуолам кэрэ кэмнэрин хаһан даҕаны умнуом суоҕа!
Наташа Осипова, “Ньургуһун” пост.
Күндээдэ, Ньурба