Кыһыҥҥы сынньалаҥмыт бүтэн, үөрэх үһүс чиэппэрэ саҕаланна. Ааспыт сыл төһө да ыарахаттардаах буоллар, хас биирдии үөрэнээччигэ, учууталга туспа ситиһиини, араас эйгэҕэ кыайыыны-хотууну аҕалла. Ньурба оройуонун П.С. Егоров аатынан Акана орто оскуолатын 9 кылааһын үөрэнээччитэ Ньургун Семенов ааспыт сыллаах ситиһиитин туһунан ахтар.
— Ааспыт сылга мин саамай өйдөөн хаалбыт түгэмминэн ахсынньы ый 17 күнүгэр өрөспүүбүлүкэтээҕи хабылык–хаамыска күрэҕэр кыайыым буолар. Бу курэх Интернет ситим нөҥүө онлайн буолбута.
2017 сыллаахха Үөһээ Бүлүүгэ буолбут Манчаары оонньуутугар кыттан, 3 миэстэ буолбутум. Онтон ыла бу дьарыкпыт ситимин быспакка, инникигэ сыал сорук оҥостон утумнаахтык дьарыктанабын.
2018-2020 с.с. өрөспүүбүлүкэҕэ хабылык–хаамыска күрэҕэр чемпион буолбутум.
Горнайга буолар Манчаары оонньуутугар оройуонум аатыттан эмиэ кыттар чиэскэ тигистим. Онон утумнаахтык дьарыктана сылдьабын. Хайаан да бириистээх миэстэҕэ тиксиэхтээхпин диэн сыал –сорук туруоруннум.
Хабылык, хаамыска киһини сымса, имигэс буоларыгар көмөлөһөр. Маны таһынан, үөрэххэ көмөлөөх, илииҥ, тарбахтарын былчыҥнара сайдаллар. Бу оонньууну биһиги дьиэ кэргэн бары сөбүлээн оонньуубут, дьарыктанабыт.
Оҕолоор, өбүгэбит төрүт оонньуутун умнумаҥ диэн барыгытын ыҥырабын!