Бэрдьигэстээххэ саха аатырбыт этно-музыканнара Клавдия, Герман Хатылаевтар оҕолору фольклорнай бөлөхтөрүгэр дьарыктыахтара.
С.П. Данилов аатынан Бэрдьигэстээх орто оскуолата саҥа үөрэх дьылыгар оҕолор духовнай өттүнэн сайдалларыгар Саха Өрөспүүбүлүкэтин норуодунай артыыстара Клавдия, Герман Хатылаевтары кытта кэскиллээх бырайыагы саҕалаатылар. Оҕолорго «Тэтим» фольклорнай бөлөхтөрүгэр сүүмэрдээһини оҥордулар. Бастакы дьарыктары күһүҥҥү каникул бириэмэтигэр былааннаатылар.
Биллиилээх музыканнар Клавдия, Герман Хатылаевтар Горнай улууһун кытта ыкса сибээстээхтик үлэлииллэр. Семен Данилов хоһоонноругар элбэх ырыа ааптардара. Даниловскай ааҕыыларга истиҥ ыалдьыт буолан, истин-иһирэх ырыаларынан киэргэтэллэр.
Биллиилээх модельер-худуоһунньук Августина Филиппованы кытта үлэлэһэн айар бырайыактарыгар кыттыбыттара.
Горнай улууһугар Мохначевскайдар ааттарынан саха музыкальнай инструменнарын оҥорор мастарыскыай төрүт дорҕоон сайдарыгар сүҥкэн суолталаах, биир ситимнээх айар үлэ буолар.
«Кэскил» медиа-оскуола.