Мэҥэ Хаҥалас улууһун Иитии концепциятын «Дьөһүөл» бырайыагын чэрчитинэн Бэдьимэ нэһилиэгэр араас сонун тэрээһин ыытыллан, олоххо киирэр.
Саха өрөспүүбүлүкэтин Судаарыстыбаннаһын уонна Иитээччи күнүгэр аналлаах тэрээһиҥҥэ бэтэрээн иитээччилэр оҕо уһуйаанын уонна оскуола таһыгар яблоня уонна акация мастары олортулар. Акация, яблоня мас үнүгэстэрин оскуолабыт попечителэ Любовь Семеновна Аргунова Дьокуускайтан бэлэх ыытан, үөрүүбүт үгүс.
Иитээччи идэлээх Надежда Николаевна Колесова, Людмила Егоровна Петрова, Варвара Иннокентьевна Аргунова, билигин улэлии сылдьар Елена Петровна Ноева, Мотрена Семеновна Филиппова бэйэлэрин илиилэрин сылааһын иҥэрэн, алҕаан олордубут мастара чэчирии үүнүө диэн эрэнэбит.
«Бэдьимэ кэскилэ» оҕо тэрилтэтин чилиэннэрэ оскуола үөрэнээччилэрин ааттарыттан аҕа табаарыстарыгар махталларын биллэрэн, Иитээччи күнүнэн эҕэрдэлээн, минньигэс букеттары туттардылар!
Өссө биир үөрүүлээх сонуммут диэн, Алёша Андреев сайыны быһа көрбүт-истибит, бүөбэйдээбит Күндээр диэн сүүрүк ата Дьокуускайга Судаарыстыбаннас күнүгэр аналлаах өрөспүүбүлүкэтээҕи ат сүүрдүүтүгэр 10 000 миэтирэҕэ күрэххэ 3 миэстэ буолла!
Ааптар: Екатерина Попова.