Дойду бэрэсидьиэнэ Владимир Путин көҕүлээбит «Култуура» национальнай бырайыагын чэрчитинэн, Алдан улууһугар Некрасов аатынан библиотеканы саҥардыы үлэтэ түмүктэнэн эрэр. Бу туһунан СӨ Култуураҕа уонна духуобунай сайдыыга министиэристибэтин пресс-сулууспата иһитиннэрэр.
«Билигин библиотекаҕа үлэһиттэр кинигэлэри уураллар, мебеллэри хомуйан туруораллар. Саҥардыы үлэтигэр тэрилтэ 2021 сылга 10 мөлүйүөн солкуобайы ылла. Саҥардыллыбыт библиотека аһыллыытын балаҕан ыйын 30 күнүгэр былаанныыллар», — диэн иһитиннэриигэ этиллэр.
Тутуу үлэтэ түмүктэннэҕинэ бастакы этээскэ библиотека, иккискэ — Smart-библиотека.
Ону тэҥэ библиотека иһигэр ааҕар хос, коворкинг, звукозапись устуудьуйата, VR-хос, оонньуур хос, 3D-тэриллээх, робототиэхиньикэҕэ аналлаах смарт-лаборатория баар буолуоҕа.
Актовай саалаҕа светодиоднай экран туруордулар. Бырайыак чэрчитинэн виниловай проигрыватель уонна пластинкалары ылбыттар.
Ону таһынан бырайыак улуус бүддүөттүттэн эбии үбүлээһини ыланнар, мөлтөхтүк көрөр дьоҥҥо анаан ааҕар массыына ыллылар.
Муниципалитет библиотекаҕа биир мөлүйүөн солкуобай курдук сууманы саҥардыы үлэтигэр биэрдэ. Онно кинилэр саҥа кинигэлэри ыллылар, ол иһигэр доруобуйаларыгар хааччахтаах дьоҥҥо аналлаах таһаарылар бааллар.