Сотору Саҥа Дьылбыт буолуо. Оттон бу дьикти кэмҥэ оҕолуун-улаханныын бары туох эрэ дьиктини-кэрэни, баҕа санаа туолуутун күүтэбит. Оттон баҕа санаа диэн тугуй? Кини туохтан үөскүүрүй? Ол туһунан Орто Халыма улууһун Г.Г. Софронов аатынан Өлөөкө-Күөл орто оскуолатын 6 кылаас үөрэнээччилэрин санааларын ааҕыҥ.
Баҕа санаа туһунан санаалар
Баҕа санаа диэн киһи өйүттэн үөскүүр. Ханнык баҕарар киһиэхэ баҕа санаалаах буолар. Бу санаа киһи улаатарыттан тутулуктаах дии саныыбын.
Баҕа санаа кэмтэн эмиэ тутулуктаах. Былыргы оҕо уонна аныгы оҕо баҕа санаата олох атын-атын. Ким туох кыһалҕаны көрсөрүттэн, хайдах олоххо олороруттан тутулуктаах.
Киһи санаата туоллаҕына, атын баҕа санаа үөскүүр.
Изольда Слепцова, 6 кылаас.
Баҕа санаа саастан тутулуктаах. Кыра оҕо баҕа санаата суох. Кини төрөппүттэрэ, аһа баар буоллаҕына онон сөп буолар. Баҕа санаа улаатан истэххэ толкуйдуур буоллахха үөскүүр.
Сорох баҕа санаа туолуо суоҕун сөп.
Люба Еремеева, 6 кылаас.
Баҕа санаа тугу эрэ, эбэтэр кими эрэ көрдөххүнэ үөскүөн сөп.
Баҕа санаата суох киһи баар буолуон сөп. Ол кини дьиэ кэргэнэ суоҕуттан дуу, бэйэтэ куһаҕан дьаллыкка ылларан, арыгыһыт буолбутуттан дуу буолуон сөп. Оннук дьон уһуннук олорботтор. Кинилэр олохторугар туохха да тардыспаттар, ол иһин түргэнник өлөллөр.
Ыра санаа туоларын туһугар киһи элбэҕи үлэлиэн наада, ол санаата туоларыгар толкуйдаан, ону эрэ батыһан толоруон сөп.
Арылхан Винокуров, 6 кылаас.
Баҕа санаа киһи тугу эрэ ымсыыра көрдөҕүнэ, үөскүүр дии саныыбын. Эбэтэр тугу эрэ саҥаны биллэҕинэ, үөскүөн сөп. Киһи улаатан истэҕин аайы санаата уларыйан иһэр. Тоҕо диэтэххэ, улаатан истэхпитинэ өйбүт сайдан иһэр.
Ол гынан баран. Баҕа санаата суох дьон бааллара буолуо. Ол баай дьоннор буолуо, кинилэргэ барыта баарыттан тугу да санаабаттар.
Игнат Винокуров, 6 кылаас.
Баҕа санаа оскуолаҕа киирэр сааскыттан үөскүүр дии саныыбын. Хас биирдии киһи баҕа санаата туоларыгар бэйэтэ талаһыахтаах. Ыра санаа туолара бэйэҕиттэн тутулуктаах. Ол гынан баран. Хаһан да туолбат баҕа санаа диэн эмиэ баара буолуо. Холобур, өлбүт киһини кыайан тилиннэрбэккин. Сорох дьон санаата итинник буолуон сөп, ону хаһан да туолбатын билэ-билэ баҕа санаа оҥостоллор. Дьон санаата араас.
Баҕа санаа баара олус үчүгэй дии саныыбын.
Эля Сухомясова, 6 кылаас.