Олунньу 15 күнүгэр Н.И. Протопопова аатынан «Оҕо айар тобулар дьоҕурун сайыннарар «Кэскил»» киинигэр П.В. Степанов аатыгар анаммыт улуустааҕы харандааһынан уонна чоҕунан уруһуй күрэҕэ буолла. Күрэҕи иилээн-саҕалаан П.А. Павлов аатынан 1 Күүлэт орто оскуолата ыытта. Күрэххэ барыта 50-тан тахса оҕо кыттыыны ылла.
Биһиги оскуола дириэктэрин Томская Сардана Владимировнаны көрсөн кэпсэттибит:
— Петр Васильевич Степанов үөрэҕин бүтэрэн баран, учуутал идэтин ылан, өр сылларга биһиги оскуолабытыгар үлэлээбитэ. Уруһуй уонна черчение учууталынан үлэлээбитэ, онтон технология учуутала буола сылдьыбыта. Кэлин уолаттары трактороведениеҕа үөрэппитэ. Миигин эмиэ үөрэппитэ, учууталым этэ. Петр Васильевич ордук харандааһынан уруһуйдуурун сөбүлүүр этэ, ол иһин күрэхпит хайысхата оннук. 2012 сыллаахха өлбүтэ. Дэгиттэр талааннаах киһи олорон ааспыт эбит.
Биһиэхэ билигин художественнай кылаас баар, Бүлүүтээҕи “Искусство оскуолатын” филиала. Оҕолору Томская Муза Васильевна үөрэтэр. Манна үөрэнэр оҕолор олох атын көрүүлээх, чыҥха атын уруһуйдаах буолаллар. Күүлэт эҥээргэ бу өттүнэн талааннаах киһи элбэх быһыылаах диэн көрөбүн. Петр Васильевич Степанов аатынан кыыһа стипендия олохтообута. Бу стипендия сыл ахсын, үөрэх бүтүүтэ бастыҥ үөрэнээччигэ, уруһуйга ситиһиилэрдээх оҕоҕо туттарыллар. Күрэх идеята кэллэктииптэн тахсыбыта. Ол саҕана биһиги оскуолабытыгар Петр Васильевич төрөппүт кыыһа Степанова Сардаана Петровна үлэлии сылдьыбыта. Кинини кытта былааннаан баран, 2014 сылтан уруһуй күрэҕин тэрийбиппит. Ол курдук сыл ахсын буола турбута. Арай пандемияттан сылтаан икки сыл буолбатаҕа. Күүлэт сирин ырааҕырҕатан бэтэрээ өттүлэр үксүн кыттааччылара суох. Күрэхтэн сүрдээх элбэх талааннаах оҕолор тахсаллар дии саныыбын. Оҕолор манна бэйэ бэйэлэрин көрөн үөрэнэллэр, холонон көрөллөр, онон күрэх суолтата улахан. Куруук быыстапка оҥоробут. Кыттааччы элбэх буолар, сүүстэн тахса буолааччы ардыгар. Жюри үлэлиир бириэмэтигэр оҕолорго мастер класс бэриллээччи. Быйыл улахан оҕолорго чоҕунан уруһуйу эбии киллэрдибит. Бу күрэх саамай астынар, киэн туттар тэрээһиммит буолар. Эһиил 2024 сылга бу күрэх үбүлүөйэ буолара күүтүллэр.
Күрэх кыттааччылара, Баппаҕаайы орто оскуолатын 7 кылааһын үөрэнээччилэрэ Соня Никифорова уонна Мираида Яковлева:
— Кыра эрдэхпититтэн уруһуйдуурбутун сөбүлүүбүт. Урут бу күрэххэ кытта иликпит. Манна натюрморт уруһуйдаатыбыт. Урут натюрморду элбэхтэ уруһуйдуу илик буолан, ол иһин сорудаҕы ыарахан соҕус дии санаатыбыт.
Күрэх түмүгэр маннык буолла: орто кылаастарга 1 миэстэни ылла 1 Күүлэт орто оскуолатын 7 кылааһын үөрэнээччитэ Мичээрэ Николаева, 2 миэстэ – Бүлүүтээҕи гимназия 8 кылааһын үөрэнээччитэ Настя Унарова, 3 миэстэ — Бүлүүтээҕи гимназия 8 кылааһын үөрэнээччитэ Наташа Черемных. Үрдүкү кылаастарга 1 миэстэ – Вилена Харлампьева, Баппаҕаайы орто оскуолатын 11 кылааһын үөрэнээччитэ, 2 миэстэ – Костя Тутукаров, 1 Күүлэт орто оскуолатын 9 кылааһын үөрэнээччитэ, 3 миэстэ – Диана Софронова, 1 Күүлэт орто оскуолатын 9 кылааһын үөрэнээччитэ.
Айнура Федорова, Анна-Нарыйа Сивцева,
Н.И. Протопопова аатынан «Кэскил» киин
“Репортер» медиакиинэ, Бүлүү к.