Бүлүү 1 №-дээх оскуолатын 5 “б” кылааһын үөрэнээччилэрэ педагог-бибилэтиэкэр Марианна Ионова сорудаҕынан кэлэн иһэр Ийэ күнүгэр анаан, «Ийэбин кытта кинигэ ааҕарбын сөбүлүүбүн” диэн тиэмэҕэ өйтөн суруйуу суруйдулар.
Ийэм уонна мин —
Иккиэн кинигэ ааҕабыт.
Кинигэҕэ билии төрдө,
Кинигэ — киһи доҕоро.
Дарина Ксенофонтова:
Ийэм мин кыра эрдэхпинэ, буукубалардаах, дьэрэкээн ойуулаах хартыынаны хоспор ыйаабыта. Онтон ыла буукубаны үөрэтэн, ааҕар буолбутум. Ийэбин кытта маҕаһыыҥҥа бардахпына, араас кинигэни атыылаһабыт. Онтон киэһэ кинигэбитин ааҕабыт, ырытан көрөбүт.Ордук кыыллар тустарынан ааҕарбын сөбүлүүбүн. Дьиэбитигэр элбэх кинигэлээхпит. Эһэм Федот Ксенофонтов – суруйааччы. Ордук кини суруйбут «Киһи да күлэр ээ», “Сиэркилэ бытархайдара” диэн көрдөөх кэпсээннэрин сөбүлээн аахпытым. Кинигэ киһиэхэ элбэх билиини биэрэр. Кинигэ — киһи доҕоро.
Софонов Дьулустаан:
Мин ийэм, Александра Петровна, уон сыл дьыссаакка иитээччинэн үлэлээбитэ. Билигин иккис идэтинэн атын үлэҕэ үлэлиир. Ийэм кинигэ ааҕарга үөрэппитэ. Бастаан кыра саастаахпар араас остуоруйалары кэпсээччи. Ийэм уонна эбэм Зоя Петровна наһаа үчүгэй хартыыналардаах, өйү сайыннарар кинигэлэри бэлэхтииллэрэ. Үс сааспар буукубалары интэриэһиргээн, ийэбиттэн: “Бу ханнык буукубаный?”- диэн ыйытар буолбутум. Ийэм тобугар олордон, ыйыппыт дорҕооммун, буукубабын этэн биэрэр этэ. Оннук интэриэһиргээн, 4 сааспар алпаабыты билбитим. Ийэм дьыссаакка бөлөхпөр иитээччи буолан, ааҕыыга дьарык бөҕө ыытар этэ. Киэһээ аайы ийэм остуоруйаны, кэпсээни ааҕара. Кыралаан буукубаны холбоон, сүһүөхтээн ааҕарга үөрэппитэ. Оскуолаҕа киирэрбэр бүтүн кинигэни ааҕар буолан киирбитим. Ийэм бэйэтэ эмиэ дьыссаат сааһыттан аахпыт, онон кинигэни ааҕарын наһаа сөбүлүүр. Билигин ийэбин кытта араас кинигэни ааҕабыт, ырытыһабыт. Сороҕор мүнүүтэҕэ ааҕарга куоталаһабыт. Мин ийэбин олус күүскэ таптыыбын.
Степанов Ян :
Биһиги дьиэбитигэр араас кинигэ элбэх. Кыра эрдэхпинэ, ийэм кинигэ ааҕан биэрэрин сөбүлүүр этэ. Иккиэн ордук энциклопедияны сөбүлээн көрөрбүт. Ийэм “Чуораанчык” сурунаалга суруттарар этэ. Онно комикстар, кэпсээннэр тахсаллар этэ.Холобур “Ҥин дюллэ дюланан бисин», «Чукачан»» (чыыкаан), «Бултулини Кума» (охотник за нерпами) эбээн остуоруйалара бааллара. “Чуораанчыкка” уонна “Кэскил” хаһыакка төлөпүөн анал сыһыарыытынан видео көрүөххэ сөп.
Тася Каратаева :
Каникул кэмигэр сайыҥҥы киэһэҕэ утуйуох иннинэ ийэбин кытта кинигэ ааҕар үэстээхпит. Мин сахалыы остуоруйалары ааҕарбын ордоробун.Олортон сөбүлүүр остуоруйам “Биэс ынахтаах Бэйбэрикээн эмээхсин”. Өйдөөбөтөх тылларбын ийэм быһааран биэрээччи. Сайынҥы каникулбар араас элбэх кинигэни аахтым. Ийэбин кытта ырытан бииргэ ааҕарбын ордук сөбүлүүбүн.