«Азия оҕолоро» омуктар икки ардыларынааҕы спорт оонньуулара, Саха Өрөспүүбүлүкэтин бастакы президенэ Михаил Николаев көҕүлээhининэн, 1996 cылтан ыла ыытыллар. Биһиги нэһилиэктэн ким даҕаны кыттыыны ыла илик. Онон бу оонньуу волонтерун кытта кэпсэттибит:
— Үтүө күнүнэн! Аида Алексеевна Нахова диэммин, 2004 уонна 2008 сылларга Дьокуускай куоракка буолбут «Азия оҕолоро» оонньууларын арыллыытыгар уонна сабыллыытыгар балтыбын кытта волонтёрунан үлэлээбиппит. Саамай өйдөөн хаалбытым 2004 сыллаахха оскуолабын бүтэрэн үөрэххэ туттарсар кэммэр буолбут оонньуулар. «Туймаада» стадион трибунатыгар олорон араас композицияны таһаарар эбээһинэстээх этибит. Араас өҥнөөх былаах, сиэркилэ тутан турбуппут. Омук бөҕөтө кэлбитэ. Биһиги Германияттан сылдьар делегацияны куорат устун күүлэйдэппиппит, нуучча тылын үөрэтэр оҕолору аҕалбыттар этэ, онон кэпсэтэрбитигэр уустугу көрсүбэтэхпит. Үлэлээбиппит иһин оччолорго биллэр «Фабрика звезд-2» кэнсиэрин босхо көрбүппүт. Бэлэмнэниигэ сылдьыбыт буолан күрэхтэһиини улаханнык көрбөтөҕүм. Азия оонньууларын тэрээһинигэр кыттыбыт буолан ол сайын туһунан үчүгэй, сырдык өйдөбүл хаалбыт.
Дайаана Нахова,
Тааһаҕар, Бүлүү.