Ньурба улууһун Маар нэһилиэгэр төрөөбүт, орто оскуоланы бүтэрэн АГИКИ-ны бүтэрбит, 12 сааһыттан фокус алыбар бэйэтин баҕатынан үөрэммит, билигин Москваҕа үөрэнэ сылдьар Дьулустан Павлов Ороһуга «Алыптаах киэһэ» диэн шоу-кэнсиэрин көрдөрөн барда.
Кулууп оҕолорунан туолан, интириэһиргээн да, ыытар алыбар тус кыттан да дуоһуйууну ыллылар.
Кини Саха сирин биллиилээх дьонугар эрэ буолбакка, Москуба куорат биллэр артыыстарыгар уонна блогердарыгар талаанын көрдөрөн сөхтөрбүтэ. Ол курдук, Михаил Литвин, Даша Дошик, Валя Карнавал, Клава Кока, Камилла Валиева, «DАВRO» бөлөх көрөн, сөҕөн-махтайан, бэйэлэрин шоуларыгар кытыннарбыттара элбэҕи этэр. Ороһуга оҕолор ордук айаҕар кумаахы ыстаан баран, хас да миэтэрэни айаҕын иһиттэн субуйан таһаарбытын сэргээтилэр, саалаттан оҕону ыҥыран таһааран, платокка ойуу уруһуйдатан баран, ыраах коробканы тутан турбут оҕо коробкатын иһигэр өссө бэрчээккэҕэ оҕо уруһуйдаабыт платога баар буолан хаалбыта, онтон да атын дьикти алыптары көрдөрдө.
Дьулустан Павлов кэнсиэрин бүтэһигэр мустубут дьоҥҥо үтүө сайыны, оту хотуулаахтык оттуулларыгар баҕарда. Олохтоохтор талааннаах эдэр киһиэхэ талаана өссө арылларыгар, этэҥҥэ сылдьарыгар баҕардылар.
«Тымтык» эдкорпост, Ороһу нэһ., Үөһээ Бүлүү.