Алтан орто оскуолатын үөрэнээччитэ Николай Сутаков бу ыйга Уфаҕа ыытыллыбыт «World Skills Junior» IX Бүтүн Арассыыйатааҕы чөмпүйэнээккэ САD инженернэй дизайн хайысхатыгар кыттыыны ылла уонна үрдүк көрдөрүүнү ситиһэн «За профессионализм» диэн медальонунан наҕараадаланна. Николай бараары сылдьан Амма улууһун «Амма олоҕо» аммагазета.рф хаһыатыгар интервью биэрэн турар. Ону бүгүн таһаарабыт.
Атырдьах ыйын 19 күнүгэр Саха сирин хамаандатын кыттыылаахтара Дьокуускай куоракка урутаан бэлэмниир кииҥҥэ ИЛ Дархан Айсен Николаевы кытта көрсөн алгыс тылын ыллылар. Алтан орто оскуолатын үөрэнээччитэ, черчениеҕэ, архитектураҕа уонна дизайҥҥа өрөспүүбүлүкэтээҕи олимпиадалар кыайыылаахтара уонна призердара Николай Сутаков саас Москубаҕа буолбут сүүмэрдиир түһүмэххэ ситиһиилэнэн, бу ыйга ыытыллыахтаах «World Skills Junior» IX Бүтүн Арассыыйатааҕы чөмпүйэнээккэ кытта баран эрэр.
Амма улууһугар Арассыыйаҕа 2019 – 2024 сылларга үлэлиир «Үөрэхтээһин» национальнай бырайыак иитинэн «Аныгы кэм оскуолата» бырайыагынан «Точка роста» эбии үөрэх кииннэрэ улууска түөрт оскуолаҕа арыллан үлэлииллэр. Салайааччылар Амма 1 № — дээх орто оскуолатыгар Егор Бубякин, Болугурга Петр Филиппов, Соморсуҥҥа Ньургун Софронеев уонна Алтаҥҥа Айталина Тихонова үлэни миэстэтигэр сүрүннүүллэр.
Барыта 26 педагог араас хайысханан оҕолору уһуйаллар, ситиһиилэр да элбээн иһэллэр. Ол курдук Арассыыйаҕа Амма орто оскуолатыттан Вася Варламов (8 кыл.) НПК лауреат, өрөспүүбүлүкэҕэ «Мин идэм — IT» күрэхтэһиигэ Дьулус Николаев, Кирилл Окороков, Артем Окоемов (9 кыл.) анал бириис хаһаайыттара, «Эрэл» байыаннай патриотическай кулууп «World Skills» чөмпүйэнээккэ 1 м., Дьулус Николаев (9 кыл.) «Инникигэ хардыы» НПК 3 истиэпэннээх дипломант аатын ыллылар. Болугуртан Варфоломей Макаров (9 кыл.) Мясниковскай ааҕыыларыгар Арассыыйаҕа ЮНЕСКО оскуолалаларын икки ардыларыгар 2 истиэпэннээх дипломант, Мирон Сергеев, Марков Вася (4 — 5 кыл.) «KidSkills» суһал робототехникаҕа 3 истиэпэннээх дипломант, Вася Марков, Максим Кузьмин (5-6 кылаастар) «Scratch» программированиеҕа 1 истиэпэннээх дипломант, Олеся Николаева (9 кылаас) быыһыыр дьыалаҕа 2м, Соморсунтан Айсена Кутукова (3 кыл.) өрөспүүбүлүкэҕэ саахымат олимпиадатыгар 1 м, Карина Лебедева (9 кыл.) «World Skills» кондитерскай дьыалаҕа 3 м, Майя Давыдова (9 кыл.) черчение олимпиадатыгар 3 м буоллулар. Алтантан Нарыйа Романова (3 кыл.) II күһүҥҥү фестивальга 2 м, Ньургуяна Неустроева (7кыл.) 1 м, Айсена Сутакова (2 кыл.), Аина Сутакова (4 кыл.) Сардаана Сутакова (7 кыл.), Ольга Артемьева (10 кыл.) дуобакка разряд нуормаларын толордулар, Таня Лаптева (2 кыл) интэриниэт күрэһигэр экологияҕа анал аат кыайылааҕа, Коля Сутаков (10 кыл.) черчение олимпиадатыгар, «World Skills Junior» ыччат чөмпүйэнээтигэр 1 м буоллулар.
Коля саас Москуба куоракка ыытыллыбыт сүүмэрдиир түһүмэҕи ситиһиилээхтик ааһан Уфаҕа ыытыллар «World Skills Junior» IX Бүтүн Арассыыйатааҕы чөмпүйэнээккэ САD инженернэй дизайн хайысхатыгар кыттан Саха сирин сүүмэрдэммит хамаандатын састаабыгар киирэн өрөспүүбүлүкэ чиэһин көмүскүөҕэ.
Кини уһуйааччытынан РФ үөрэҕириитин бочуоттаах үлэһитэ, РФ үөрэҕириитин туйгуна, Академик В.П. Ларионов аатынан фонда лауреата, «Улуус киэн туттуута» бэлиэ хаһаайына, Алтан нэһилиэгин бочуоттаах олохтооҕо Михаил Аполлонович Стручков буолар.
«Сүрүн ситиһиилэрбинэн черчениеҕэ, архитектураҕа уонна дизайҥҥа өрөспүүбүлүкэтээҕи олимпиадалар кыайыылаахтара уонна призердара буолбутум. Маныаха кыра эрдэхпиттэн алын сүһүөх кылаастан саҕалаан уруһуйга, сэттис кылаастан черчениеҕэ үөрэппит, билигин даҕаны дьарыктыы сылдьар учууталбар Михаил Аполлоновичка махталым улахан. Саас Москубаҕа баран ситиһиилээхтик күрэхтэһэн, салгыы Арассыыйатааҕы чөмпүйэнээккэ кыттар чиэскэ тиксибитим. Мин хайысхабар Сахабыт сиригэр Дьокуускай, Мэҥэ Хаҥалас, Уус Алдан, оттон Арассыыйаҕа Москуба, Санкт Петербург, Ульяновскай кыттааччылара инники күөҥҥэ сылдьалларын бэлиэтии көрбүтүм. Маннык тэрээһиннэргэ сырыттахха дьоҕуруҥ сайдар, кыаҕыҥ улаатар, барытыгар үөрүйэх буолаҕын. Уфаҕа буолаары турар дойду күрэхтэһиитигэр өрөспүүбүлүкэттэн араас хайысхаларга барыта отуттан тахса кыттааччы баран эрэбит. Бүгүн Дьокуускай куоракка урутаан бэлэмниир кииҥҥэ ИЛ Дархан Айсен Николаевы кытта көрүстүбүт, алгыс тылын ыллыбыт. Чөмпүйэнээккэ билиибин, сатабылбын барытын туһанан кыттыам», — диэн санаатын үллэстэр Николай Сутаков.
Подробнее: https://xn--80aaaambpp4b1d.xn--p1ai/article/21619