Сааскы күн быыс булан Амма Аччыгыйын туһунан «Кэрэ кэпсээн» биэриини көрдүм. Ол олорон дьоллоох, тэбэнэттээх сэбиэскэй оҕо сааспын санаатым. Сыып-сылаас, сырдык дьиэбин, таптыыр ийэбин, 6-с кылааска үөрэнэ сылдьан «Сааскы кэм» арамааны аан бастаан умсугуйан аахпыппын.
Онтон биэриини истэ олорон салгыы Амма Аччыгыйын аан бастаан чугастан, тутан туран көрбүт кэммин санаатым.
7-с кылааһы бүтэрбитим кэннэ этэ. Бэс ыйа. Таптаан ааҕар «Бэлэм буол» хаһыаппыт 50 сыллаах үбүлүөйүгэр эдэр кэрэспэдьиэннэр бастакы сүлүөттэригэр Дьокуускайга муһуннубут.
Мин оччолорго дойдум сонуннарын тиһигин быспакка хаһыакка суруйабын, сороҕун бэчээттииллэр этэ, оччоҕо дьэ доҕотторбор, дьоммор кэпсиибин, хаһыаппын мунньан иһэбин. Ити этэр сүлүөппэр Мэҥэ Хаҥалас оройуонун дэлэгээтэбин.
Биир күн Бэчээт дьиэтигэр суруйааччылардыын көрсүһүү буолла. Итии да итии, киһи, оҕо бөҕө. Күннүк Уурастыырап уонна Амма Аччыгыйа бааллар. Элбэҕи интэриэһинэйи кэпсээтилэр, сороҕун суруннум. Сотору көрсүһүү бүтэн пионердар блокноппутун тутан автограф ыла уочараттаан турдубут. Иннибэр турар оҕолор иккиэннэригэр баттатан истилэр. Мин уочаратым субу кэллэ, үөрүүбүттэн сүрэҕим тиҥ-тиҥ тэптэ, турар сирбэр тэпсэҥнээтим, хаалтыспын көннөрүннүм. Миигиттэн чугас олорор киһиэхэ Күннүк Уурастыырапка блокноппун ууннум, киһим илииспэр улахан баҕайы гына «К.Уураст» диэн илиитин баттаата (ханна эрэ баара, ууруна сылдьабын). Арай Амма Аччыгыйа диэки сыҕарыйыах буолан истэхпинэ Күннүк Урастыырапка маннык диэтэ: «Дугаар, мин даачабар тиэтэйэбин, бардым…». Туран оҕолордуун бакаалаһан тахсан баран хаалла… Оо, онно олус да хомойбутум баара. Тоҕо, туох иһин миэхэ автограф биэрбэтэ диэн. Оҕо буоллаҕым. Биир илиискэ эрэ илии баттааһыннаах туран хааллым…
Кэлин ахтыылартан билбитим, ол саҕана суруйааччы тапталлаах кэргэнэ Любовь Федоровна улаханнык ыалдьан сыппыт эбит, ол иһин тиэтэйээхтээбит. Сөп буоллаҕа. Биһиги олус элбэх этибит эбээт, уот кыһыл хаалтыстаахтар, сэбиэскэй кэм бастыҥ оҕолоро — пионердар.
Елена АРХИПОВА, «Бэлэм буол» кэрэспэдьиэнэ,
хаһыат 50 сыллаах үбүлүөйдээх слетун кыттыылааҕа,
литературовед, Дьокуускай