Таатта улууһун Ытык Күөл Алампа аатынан оскуолатын оҕолорун АйТи хайысха туһунан санааларын учуутал Вера Петровна Огонерова билиһиннэрэр.
Сережа Бехтюев, 11 кылаас:
— Билиҥҥи сайдыылаах үйэҕэ оҕолор бары АйТи хайысха өттүнэн бара сатыыллар. Эмиэ да сөпкө гыналлар, тоҕо диэтэххэ, инникитин туох буолара биллибэт, баҕар билиҥҥи үлэбитин роботтар солбуйуохтара, оннук буолуо диэн сэрэйиллэр.
АйТи идэтин арааһа элбэх: системнай администратор, инженер — программист, биоинформатик, о.д.а.
Системнай администратор туьунан билиһиннэрдэххэ, кини эбээһинэһэ диэн хонтуруол, холобур, көмпүүтэрдэр «штатнай» үлэлэрэ, бырагыраамаларын туруоран, саҥардан биэрии, о.д.а.
Тумугум маннык, АйТи диэн олус түргэнник сайдан иһэр хайысха. Саха сириттэн кыахтаах айтишниктар тахсан эрэллэр, ол иһин биһиги, оскуола оҕолоро, эмиэ хаалымыахпытын наада. Айтишник олох араас эйгэтигэр барытыгар наада буолара саарбаҕа суох.
Ыччат идэтин таларыгар туһаайан этиэм этэ: аны толорооччу эрэ буолбакка, сонун идиэйэ биэрээччи, саҥа саҕахтары арыйааччы киһи наада буолар кэмэ кэллэ.
Бэйэм туспунан кэпсиир буоллахха, мин эмиэ ити эҥэр барыахпын баҕарабын- «прикладной информатика” эбэтэр “информационные технологии”. Мээнэ сылдьыбакка, олимпиадаларга, араас тэрээһиннэргэ кытта сатыыбын, холобур: «Разработка мобильных приложений» диэн куонкуруска бастакы миэстэ буолбутум, ХИФУ олимпиадаларыгар кыттыбытым, о.д.а.
Алёша Петров, 9 кылаас:
— Мин санаабар, билигин IT идэлэрэ наһаа наадалаахтах. Аныгы технология биһиги дойдубут экономикатыгар олус улахан суолталаахтар. Бу хайысха өттүнэн барар суол биһиги дойдубут инники дьылҕатын быһаарыаҕа.
Мин билигин inDriver компания салайааччыта Арсен Томскай кинигэтин ааҕа сылдьабын. Кини кыһалҕалаах, ыарахан, доҕор-атас буолбат кэмнэргэ, ол саҕана Саха сиригэр ким да билбэт IT технологияны уонна сайтары айан киирэр барбыта. Кини ити кэмҥэ сөптөөх идэни талбыта. IT кыаҕа улаханын, олохпут ханнык баҕарар эйгэтигэр барытыгар үлэлиирин билигин киһи барыта билэр. Манна даҕатан эттэххэ, inDriver сыһыарыыны дьиҥнээх айааччытытынан Александр Павлов буолар.
Биһиги киһи наадыйар, туһалаах ханнык баҕар сайты, мобильнай сыһыарыыны да буоллун, айа-оҥоро сылдьыахпытын наада.
Миэхэ төбөбөр эмиэ сотору-сотору оннук-маннык туһалаах санаалар, саҥа идиэйэлэр киирэллэр, ол гынан баран суруммакка хаалабын. Оскуоланы бүтэрдэхпинэ, баҕар, IT идэни талыам.
Сережа Плотников, 6 кылаас :
— Мин робототехника куруһуогар 4-с кылаастан сылдьабын. Сыл аайы араас күрэхтэргэ кыттабын. Ааспыт сылга «Роботс» диэн күрэххэ 1-гы миэстэ буолбутум. Быйыл 1-гы уонна 3-с буоллум. Мин санаабар, АйТи идэлэрэ олус наадалар. Тоҕо диэтэххэ, билиҥҥи олоххо технология түргэнник сайдар. Билигин барытын кемпүүтэр нөҥүө оҥоробут.
Билигин бырагыраамалар биир-икки сылынан эргэрэн иһэллэр. Технология сайдан истэҕин аайы, АйТи эйгэҕэ элбэх саҥа үлэһит наада буолуо дии саныыбын.