Өлүөхүмэ улууһун А.Г.Кудрин-Абаҕыыныскай аатынан Абаҕа орто оскуолатын оҕолорун АйТи эйгэтин туһунан санааларын учуутал Раиса Иннокентьевна Уйгурова билиһиннэрэр.
Мичил Егоров, 10 кылаас:
— Мин санаабар, билигин бу араас саҥа технология үйэтигэр хас биирдии киһи көмпүүтэринэн үлэлиири сатыан наада, тоҕо диэтэххэ, бары үлэҕэ барытыгар көмпүүтэр туттуллар.
IT идэлэр туспа араастаахтар. Биһиги оскуолабыт медиа-киинигэр дьарыктанабыт. WorldSkills чемионаттарыгар кыттан, мин мультимедийнай суруналыыстыка, Маркин Айтал графическай дизайн идэлэрэригэр холонон көрбүппүт.
Билигин бу вирус аймалҕаныгар бары дистанционнай үөрэххэ көстүбүт. Бу маннык үөрэтии бэйэтэ туспа уустуктардаах эбит. Учууталлар уруок ыыталларыгар араас ыарахаттары көрсөллөр. Холобур, нуучча тыла, математика бэридимиэттэригэр анал платформалар бааллар, онтон саха тылыгар, литературатыгар, төрүт культуратыгар аналлаахтар суохтар. Ону бэлэмнииргэ учууталлар IT үлэһит көмөтүгэр наадыйаллар. Онон IT идэ үөрэх араас хайысхата сайдарыгар олус наадалаах эбит диэн санааҕа кэллим.
Айтал Кузьмин, 11 кылаас
— IT — билиҥҥи кэмҥэ олох бары эйгэтигэр туттуллар олус наадалаах, туһалаах хайысха. Мин быйыл оскуолабын бүтэрээри сылдьабын. Инники олохпор ханнык идэни баһылыырбын өр толкуйдаан баран, IT идэтигэр үөрэниэхпин баҕарар эбиппин диэн санааҕа кэллим. Ол иһин БКЭ быһыытынан информатиканы таллым. Бу идэлэргэ биһиги өрөспүүбүлүкэбитигэр ХИФУ уонна АГИКИ үөрэтэллэрин билэбин, онно туттарсан көрөр санаалаахпын. IT идэтэ, ис-иһигэр киирдэххэ, бэйэтэ эмиэ араастаах. Мин программист идэтин баһылаан, “MyTona“ компанияҕа үлэлии киириэхпин баҕарабын. Бу компания үлэтин биһириибин. Кэнники да кэм көрдөрөрүнэн, бу улахан ыарыы турбут кэмигэр компанияны төрүттээбит бырааттыы Ушницкайдар өрөспүүбүлүкэҕэ улахан көмөнү оҥордулар. Кинилэр биһиги республикабыт сайдарыгар күүскэ үлэлииллэр. Онон мин маннык улахан кыахтаах IT компанияҕа үлэлиэхпин баҕарабын.
Эрчим Егоров, 3 кылаас үөрэнээччитэ:
— Айтишниктар наһаа наадалааҕы оҥороллор. Биһиги көмпүүтэргэ оонньуур араас оонньууларбытын айаллар. Кинилэр Ватсап төлөпүөн сыһыарыытын оҥорон, эмиэ бары туһанабыт. Өссө билигин дьиэҕэ олорор кэммитигэр биһиги ZOOM диэн видео-ситиминэн үөрэнэбит. Ол наһаа үчүгэй, оскуолаҕа кылааска олорор курдук, учууталбытын уонна оҕолору барыларын көрө олоробут. Онон компьютерщик идэтэ олус наадалаах уонна туһалаах.