Быйылгы үөрэх үлэһиттэрин Атырдьах ыйынааҕы мунньаҕа Арассыыйа биир ньыгыл үөрэхтээһинин эрэгийиэннээҕи олуктарыгар олоҕурар. Быйылгы үөрэх дьылын уратылардаах көрсөбүт, ол курдук саҥа үөрэх дьылыттан саҥардыллыбыт федеральнай судаарыстыбаннай үөрэх стандарта (ФГОС) уонна дойдубут үрдүнэн оҕо биир уопсай хамсааһына киирэр.
Дойду Бэрэсидьиэнэ Владимир Путин үүнэр 2023 сылы Педагог уонна настаабынньык сылынан биллэрбитэ. Онон быйылгы үөрэх дьылыгар үөрэх эйгэтин үлэһиттэригэр улахан сыал-сорук турар.
СӨ үөрэх уонна наука миниистирэ Ирина Любимова пленарнай мунньахха маннык диэн эттэ: «Биһиги оҕону төрөөбүт төрүт тылын уонна норуотун култууратын, үгэстэрин билэ улаатарын курдук иитэн-үөрэтэн таһаарар соруктаахпыт. Билигин оскуолаларга иитии үлэтигэр дириэктэр сүбэһитэ диэн саҥа, чопчу оҕолору кытары алтыһар, үлэлиир саҥа дуоһунас киирдэ. Маны таһынан чаҕылхай ыччаты иитэн таһаарарга биһиги эмиэ болҕомтобутун ууруо тустаахпыт».
СӨ Ил Түмэн билимҥэ, үөрэхтээһиҥҥэ, култуураҕа, маассабай информация сириэстибэлэригэр уонна уопсастыбаннай үлэ дьыалаларыгар сис кэмитиэт бэрэссэдээтэлэ Феодосия ГАБЫШЕВА улахан болҕомтону дойдуга бэриниилээх буолууга уурарга туһаайар. Быйылгы үөрэх дьылыттан 5-9 кылаас үөрэнээччилэригэр «Основы духовно-нравственной культуры народов РФ» диэн саҥа биридимиэт киирэр.
![](https://keskil14.ru/wp-content/uploads/2022/08/b6f06fa4-c9fe-4966-b057-15723cdca546-1-1.jpg)
Пленарнай мунньах кыттыылааҕа, Саха сиринээҕи аҕалар лиигэлэрэ уопсастыбаннай тэрилтэтин бэрэссэдээтэлэ Айхал Габышев кэккэ этиилэри киллэрдэ:
— Оҕо уһуйааннарыгар, оскуолаларга оҕолорбутугар анаан битэмииннэри, холобура, Омега-3, Д уонна о.д.а. оҕо эт-хаан, өй-санаа өттүнэн сайдарыгар туһалаах битэмииннэри биэрэри тэрийиэхтээхпит. Ону таһынан оҕо уһуйааннарыгар, оскуолаларга Аҕа түмсүүлэрин тэрийиэхтээхпит, төрөппүт мунньаҕар аҕалар тэҥҥэ сылдьалларын ситиһиэхтээхпит. Бүгүҥҥү күҥҥэ Саха сирин оскуолаларын үрдүнэн эр киһи учуутал ахсаана олус аҕыйах, уопсайа 20 эрэ быраһыан буолар, бу өттүгэр биһиги күүстээх, киэҥ далааһыннаах үлэни ыытыахтаахпыт, эр киһи учуутал аатын-суолун үрдэтэн биэриэхтээхпит. Манна аналлаах араас хабааннаах күрэхтэри, тэрээһиннэри тэрийиэхтээхпит. Ону таһынан 2023 сылы Сахабыт сиригэр Аҕа сылынан биллэриэххэ диэн этиилээхпит, бу Ийэ сылын үтүө салҕааһына буолар. Дьиэ кэргэн бигэ туруктаах буолуутугар ийэ уонна аҕа суолтатын биһиги өрө тутуохтаахпыт, оччоҕуна эрэ дойдуларыгар бэриниилээх, сайдыылаах оҕолор үүнэн-сайдан тахсыахтара диэн биһиги билэбит. Маны таһынан, 2024 сылы Арассыыйа үрдүнэн Дьиэ кэргэн сылынан биллэриэххэйиҥ диэн этии киллэрдибит. Тоҕо диэтэр, олохпут, сайдыыбыт, билиибит барыта дьиэ кэргэнтэн саҕаланар, дьиэ кэргэнтэн тутулуктаах, онон дьиэ кэргэн идеологиятын Арассыыйаҕа күүскэ тарҕатыахтаахпытын сөпкө өйдүөхтээхпит.
Бэлэмнээтэ Анна СЛЕПЦОВА.