Бүтүн Россия үрдүнэн оскуолаларга тиһэх чуораан лыҥкыныы чугдаарда. Бу уон биир сыл устата биһиги үөрэх эрэ өттүнэн буолбакка, олох араас эйгэтиттэн элбэх билиини ыллыбыт уонна элбэх ситиһиилэннибит.
Биһиэхэ суруналыыстыка аанын сэгэтэн биэрбит тапталлаах «Кэскил» хаһыаппытыгар махталбытын тириэрдиэ этибит. Биһиги бэһис кылаастан ыла «Ай-тал» пресс-кулуупка дьарыктанабыт. Салайааччыбыт Мария Ивановна Ноевалыын «Кэскил» хаһыаты кытта ыкса үлэлэһэбит. Оҕолорго анаан ыытыллар араас куонкурустарга көхтөөхтүк кыттыбыт, сонуммутунан үллэстэн ыстатыйалары суруйан ыытабыт.
«Кэскил» хаһыат 80 сыллаах үбүлүөйүгэр анаммыт сүлүөккэ кыттан, үөрэн-көтөн кыттан кэлбиппит. Ону таһынан, эдкор буоларбыт быһыытынан, араас үрдүк таһымнаах тэрээһиннэргэ кэрэспэдьиэн үрдүк аатын ылан, умсугутуулаахтык үлэлээбиппит. Ол курдук, «Кэскил» издательство ыҥырыытынан 2018 с. норуоттар икки ардыларынааҕы «Азия оҕолоро» интеллектуальнай оонньууну, 2019 с Сахалиҥҥа ыытыллыбыт I Кыһыҥҥы «Азия оҕолоро» спортивнай оонньууну сырдатар пресс – кииннэригэр үлэлээбиппит, Санкт-Петербург куоракка «ОМ-school» диэн медиа-оскуолаҕа билиибитин дириҥэтэн кэлбиппит.
Бу тэрээһиннэргэ кыттан, биһиги тус бэйэбитигэр элбэх саҥа билиини ыллыбыт, киһи быһыытынан сайынныбыт, дьону кытта уопсай тыл буларга үөрэннибит. Маннык айар эйгэҕэ, араас элбэх талааннаах дьону кытта үлэлээн, айар дьоҕурбут сайдар, саҥа доҕоттордоноҕун, бэйэҕин атын өттүттэн арыйан көрөҕүн.
Өссө төгүл махталбытын тиэрдиэхпитин баҕарабыт «Кэскил» оҕо хаһыатыгар уонна ытыктабыллаах салайааччыбыт Мария Ивановна Ноеваҕа маннык умнуллубат кэрэ-бэлиэ күннэри биһиэхэ бэлэхтээбиттэригэр. Тапталлаах хаһыаппыт өрүү үүнэ-сайда турдун, талааннаах, умсугуйан туран суруйар эдэр кэрэспэдьиэннэрдээх, элбэх ааҕааччылардаах буоллун!
Дуня Михайлова, Вика Агеева «Ай-тал» пресс-кулууп эдкордара.
Бэрдьигэстээҕи гимназия, Горнай