Саха Өрөспүүбүлүкэтин агропромышленнай комплекснай ресурснай хааччыйыы киинэ агро-хайысхалаах оскуолалары кытта сөбүлэһии түһэрсибитэ. Ол чэрчитинэн, ахсынньы ый 9 күнүгэр бииргэ үлэлээһин, идэҕэ туһаайыы тэрээһини ыытта. Тэрээһиҥҥэ агро-хайысхалаах Кеша Алексеев аатын сүгэр Хаптаҕай орто оскуолата (Мэҥэ-Хаҥалас), М.Е. Васильева аатынан 2 Малдьаҕар оскуолата (Хаҥалас) уонна Модут оскуолата (Нам) кыттыны ыллылар.
Тэрээһини начальник солбуйааччыта Дмитрий Анатольевич Филиппов арыйда, оскуолаларга, оҕолорго ситиһиини баҕарда. Бастаан хамаандалар бэйэ-бэйэлэрин билсиһиннэрэр визитка көрдөрдүлэр. Ол кэннэ кэлбит оҕолору булкаас хамаандаҕа арааран «Тыа хаһаайыстыбатын билээччи» квиз-оонньуу ыыттылар. Салгыы саҥа технологиялары билиһиннэрэн, виртуальнай быыстапка көрдөрдүлэр. Быыстапканы оҕолор сэргээтилэр.
Тэрээһин түмүгүнэн тэрийээччилэр оҕолорго, куратордарга махтаннылар уонна өйдөбүнньүк бириистэри туттардылар, кыайыылаахтар анал ааттарынан наҕараадаланнылар.
Биһиги оскуолабытыттан «Гений мысли» анал ааты 10 кылаас үөрэнээччитэ Арина Терентьева ылла. Аринаҕа СӨ үөрэҕин уонна билимин министиэристибэтэ сертификат туттарда. Ону таһынан Дьокуускайдааҕы тыа хаһаайыстыбатын техникумун устудьуоннара, преподавателлэрэ идэлэрин, ветеринария туһунан, маны таһынан, балык, үүт-ас бородууксуйатын туһунан билиһиннэрдилэр.
Маннык тэрээһин оҕолорго умнуллубат өйдөбүлү, билиини хаалларда.
Валя Спиридонова, «Кустук» медиастудия, Хаптаҕай орто оскуолата.