Кэлиҥҥи кэмҥэ агрооскуолалар тэриллэн оҕону тыа үлэтигэр сыһыара үөрэтэллэрэ бу сөптөөх үөрэх-үлэ хайысхата. Кыра эрдэҕиттэн үлэлии үөрэммит оҕо үлэҕэ-хамнаска, олоххо ордук бэлэмнээх, эрдэттэн сатабыллаах уонна үлэттэн чаҕыйбат буолар. Агрооскуола сүрүн соруга онно сытара саарбаҕа суох.
Үөрэх үлэһиттэрин Атырдьах ыйынааҕы сүбэ мунньахтарын чэрчитинэн элбэх вебинар кэтэхтэн ыытылла турар. Биир оннук онлайн былаһаакканан «Юные якутяне» өрөпүүбүлүкэтээҕи тирэх киин ыыппыт «Саха сирин агрооскуолаларын инники сайдыыта» диэн семинар буолла. Манна оройуоннааҕы үөрэх салалтатын үлэһиттэрэ, оскуола учууталлара, орто анал уонна үрдүк үөрэҕин кыһалара кыттыыны ыллылар.
Семинар модераторынан «Юные якутяне» тирэх киин үлэһитэ Анна Сыромятникова буолла. Кини маҥнай чуолаан 2024 с. диэри ылыныллыбыт агрооскуолалары сайыннарыы былааннаммыт үлэтин билиһиннэрдэ.
Кэтэхтэн мунньахха тыа хаһаайыстыбатын иһитиннэрэр, быһаарыы биэрэр киинин салайааччыта Семен Плотников, Арктическай судаарыстыбаннай университет ректорын эбээһинэһин толорооччу Константин Кривошапкин, Үөһээ Бүлүү улууһун Хоро орто оскуолатын дириэктэрэ Розалия Самсонова, ЯНИИСХ гельминтология лабораториятын сэбиэдиссэйэ, тыа хаһаайыстыбатын аччыгый академиятын салайааччыта Людмила Коколова, Таатта улууһун агрооскуолаларын куратора, улуустааҕы үөрэх салалтатын салайааччытын солбуйааччы Зинаида Охлопкова, П.Н. уонна Н.Е. Самсоновтар ааттарынан Хатас орто оскуолатын дириэктэрэ Николай Слепцов, Уус-Алдан улууһун И.И.Гоголев-Даргыбыай аатынан Найахы орто оскуолатын дириэктэрэ Мирияна Сивцева кыттыыны ыллылар уонна бэйэлэрин киэҥ хабааннаах үлэлэрин хайысхаларын кытары билиһиннэрдилэр.
«Юные якутяне» өрөпүүбүлүкэтээҕи тирэх киин иһигэр агро үөрэхтээһин ис тутулун, хайысхатын, ааспыт үөрэх дьылыгар ыыппыт тэрээһиннэрин уонна инники кэскилин туһунан дириэктэр Варвара Васильева кэпсээтэ. Түмүккэ Варвара Альбертовна СӨ Судаарыстыбаннай Мунньаҕын (Ил Түмэн) анал үөрэхтээһиҥҥэ, наукаҕа, сонуну киэҥник тарҕатар сириэстибэҕэ бастайааннай хамыыһыйатын салайааччытыгар, Саха сирин агрооскуолаларын сойуустарын бэрэссэдээтэлигэр, өрүү өйөбүл-тирэх буолар Феодосия Васильевна Габышеваҕа махтал тылларын анаата.
Вебинар кыттааччыларыттан, араас оройуонтан элбэх этии киирдэ, ол Атырдьах ыйынааҕы учууталлар мунньахтарын резолюциятыгар киириэҕэ.
Хас биирдии оҕо кыра сааһыттан үлэҕэ сыста үөрэниэхтээх. Онтон агрооскуола оҕону үлэҕэ өссө чугастык уһуйан иитэрэ ол хайҕаллаах суол.
Суруйда Анна СЛЕПЦОВА.