Аҕам саастаах дьон норуоттар икки ардыларынааҕы күнэ 1991 сылтан сыл аайы алтынньы 1 күнүгэр бэлиэтэнэр. Кырдьаҕас дьоммут, эһээлэрбит, эбээлэрбит омукпут муудараһын, өбүгэлэрбит туһунан үтүө өйдөбүлү илдьэ сылдьар баар-суох ситиммит буолаллар. Дэлэҕэ даҕаны, норуот өс хоһоонугар «кырдьаҕаһы хааһахха хаайа сылдьан, сүбэлэт» диэн этиллэр. Ааҕыҥ, кырдьаҕастарбыт ыччакка анаабыт баҕа санааларын, үтүө тылларын!
Иван Иосифович Винокуров, 92 саастаах: “Дойдугутугар бэриниилээх буолуҥ”
Таатта улууһугар соҕотох хаалбыт Аҕа дойду улуу сэриитин кыттыылааҕа. Сэрии кэнниттэн колхозка, совхозка эҥкилэ суох үтүө суобастаахтык үлэлээбитэ. Кэргэнэ Анастасия Лукиничналыын 10 оҕону төрөтөн, иитэн, үөрэттэрэн, ыал оҥортообуттара. Таатта улууһун, Алдан нэһилиэгин Бочуоттаах олохтооҕо, СӨ «Ытык аҕа» бэлиэ хаһаайына.
Виктор Васильевич Неустроев, 91 саастаах: «Куруутун ааҕа-үөрэнэ сылдьыҥ, үтүөҕэ-кэрэҕэ тардыһыҥ».
Таатта Уус Тааттатын олохтооҕо. Сэрии кэмигэр улахан дьону кытта тэҥҥэ колхозка үлэлээбитэ. Аармыйаҕа Курильскай арыыларга сулууспалаабыта. Милицияҕа, сибээс тэрилтэтигэр, нефтебазаҕа үлэлээбитэ. Улахан дьиэ кэргэн аҕата, эһэтэ, хос эһэтэ.
Фатина Максимовна Федорова, 91 саастаах: «Үлэни өрө тутуҥ».
Тыыл уонна үлэ бэтэрээнэ, элбэх оҕолоох ийэ, улахан дьиэ кэргэн эбээтэ. Сунтаар улууһун Кутана нэһилиэгин Бочуоттаах олохтооҕо, Сунтаар улууһун Бочуоттаах бэтэрээнэ.
Иосиф Иннокентьевич Иванов, 87 саастаах: «Элбэхтик сатыы хаамыҥ”.
Кэбээйи Мукучутун олохтооҕо, тыыл бэтэрээнэ. Куруутун сатыы хааман, сылгыларын көрөр-истэр. 4 кыыстаах, сиэннэрдээх.
Петр Николаевич Захаров, 86 саастаах: «Дьиэ кэргэни ийэ тутан олорор. Ийэҕитин харыстааҥ!»
Сиэгэн Күөл олохтооҕо, тыыл бэтэрээнэ, «Гражданскай килбиэнин иһин» , «СӨ бочуоттаах бэтэрээнэ», «СӨ бочуоттаах кырдьаҕаһа (Ытык субэ)» бэлиэлэр наҕараадалаах. РФ суруналыыстарын Сойууһун чилиэнэ (хаартыскаҕа — уҥата).
Егор Васильевич Готовцев, 80 саастаах: «Кытаатан элбэх сүөһүнү иитиҥ!”
Сиэгэн Күөл олохтооҕо, тыа хаһаайыстыбатын бэтэрээнэ, сэрии кэмин оҕото. “Гражданскай килбиэнин иһин” бэлиэлээх, Кэбээйи улууһун Бочуоттаах гражданина (хаартыскаҕа хаҥас олорор).
Ульяна Кирилловна Аржакова, 77 саастаах: «Куруутун үөрэ-көтө сылдьыҥ».
Дьокуускай Тулагытын олохтооҕо. Сааһын тухары «Якутскай» совхозка ыанньыксытынан үлэлээбитэ. Сахалыы хаһыаты, кинигэни ааҕарын сөбүлүүр.
Екатерина Михайловна Гоголева, 83 саастаах: “Бары үөрэхтээх дьон буолуҥ”
Уус Таатта олохтооҕо. 26 сыл устата колхозка, совхозка ыанньыксытынан үлэлээбитэ. “Бочуот знага” уордьанынан, «Коммунистическай үлэ ударнига” бэлиэнэн наҕараадаламмыта.
Мария Семеновна Максимова, 85 саастаах: «Куруутун ааҕа, үөрэнэ сылдьыҥ, үтүөҕэ-кэрэҕэ тардыһыҥ».
Биология, химия учууталынан, Алдан нэһилиэгин Сэбиэтин бэрэссэдээтэлинэн үлэлээбитэ. Таатта улууһун, Алдан нэһилиэгин Бочуоттаах олохтооҕо. Улахан дьиэ кэргэн ийэтэ, эбэтэ, хос эбэтэ.
Мария Кирилловна Афанасьева, 82 саастаах: «Көнө санааны көнтөс гыныҥ, сүрэхтээх-бэлэстээх буолуҥ».
Сунтаар Кутанатын олохтооҕо. «Ийэ албан аата» уордьан 1,2,3 испиэпэннээх кавалера, кооперация туйгуна, социалистическай куоталаһыы кыайыылааҕа.
Таисия Алексеева keskil14.ru