Сэтинньи 12 күнүгэр улуустааҕы аҕалар сүбэлэрэ оскуола үрдүкү кылаас уолаттарыгар сылын аайы ыытыллар муҥханы быйыл эмиэ тэрийдэ.
Муҥхаҕа уолаттары сиэр-туом толоруута, муҥха хайдах ыытылларын быһаарыы, көрдөрүү, тэҥҥэ бары үлэлээһин туһунан үөрэттилэр. Муҥха Аллаҥа дэриэбинэтин таһыгар баар Көчүй күөлгэ буолла. Биһиги оскуолаттан уопсайа 24 оҕо, 5 улахан киһи сырытта.
Биһиги 8-а кылаастан алта уол сылдьыста: Ваня Петров, Айсаар Бычыгыров, Ариан Алексеев, Ярик Попов, Антон Трофимов, Любомир Васильев сырыттылар. Уолаттар муҥха интэриэһинэй, элбэххэ үөрэнэн кэллибит дэһэллэр.
Уопсайа 230 киһи муҥхаҕа кыттыыны ылла, барыта 20 куул балык хостонно. Онон уолаттар дьиэлэригэр өттүк харалаах тиийдилэр.
Муҥхаҕа сылдьыбыт уолаттарга барыларыгар туоһу сурук туттардылар.
Анисия Семенова, Сунтаар бастакы нүөмэрдээх орто оскуолатын медиакиин эдкора.