Бүгүн Үлэ кварталыгар «Проблемы и перспективы развития детского туризма в Якутии» экспресс-сессия ыытылынна. Тэрээһин сүрүн ыалдьыттарынан Саха сирин урбааҥҥа, эргиэҥҥэ уонна туризмҥа миниистирэ Тимур Юрьевич Ханды, Саха сирин Үөрэх Министиэристибэтин департаменын салайааччыта Семен Викторович Иванов, «Юные Якутяне» ресурснай киинтэн дириэктэр Ирина Васильевна Черкашина уонна Петр Семенович Акимов буоллулар.
Кэпсэтии Саха сиригэр туризм туох кыһалҕалары көрсөрүн туһунан боппуруостан саҕаланна. Сүрүн кыһалҕа бары ирдэбиллэргэ сөп түбэһэр турмаршруттар аҕыйахтара, тас дойдуттан киирии туристардааҕар бэйэбит туристарбыт атын дойдуга сынньана бараллара ыйылынна. Ол эрэн, кэлиҥҥи кэмҥэ Өймөкөөн, Амма, Горнай, Хаҥалас улуустарыгар күүскэ сайдан эрэрин, атын да улуустарга дьон интэриэстээҕин туһунан бэлиэтээтилэр. Бу үлэҕэ оҕолорбут сысталлара, бэйэлэрэ маршрут толкуйдууллара, ону таһынан, бэйэлэрин дойдуларын устун айаннаан-хааман билэллэрэ, айылҕалыын алтыһаллара кинилэр дьиҥнээх патриот буола улааталларын биир сүрүн олуга буоларын бэлиэтээтилэр.
Тэрээһин ыҥырыылаах ыалдьыта Арассыыйа уопсастыбаннай палаататын чилиэнэ, Красноярскай кыраай оҕо уонна эдэр ыччат туризмын уонна кыраайы үөрэтии киинин дириэктэрэ Наталья Викторовна Грушевская Москва куораттан быһа холбонон бэйэтин үлэтин уопутун уонна инники былаанын туһунан кэпсээтэ. Ону таһынан, Саха сирин кытта ыкса сибээстээхтик үлэлиир баҕа санаалааҕын туһунан эттэ.
Тэрээһин иккис аҥаарыгар бэйэлэрэ бырайыактаах тэрилтэлэр, урбаанньыттар үлэлэрин туһунан сырдаттылар. Ол курдук, Николай Егорович Мординов – Амма Аччыгыйа аатынан «Кэскил» оҕо бэчээтин кыһатыттан сетевой изданиелар сүрүн эрэдээктэрэ Татьяна Васильевна Чьямова Саха сирин улуустарын сырдатар «Бэлэм буол» сурунааал туһунан сырдатта, «Орто дойду» туристическай комплекс оҕолорго анаан турмаршрут үлэлэтэр санаалааҕын туһунан Андреева Марианна Матвеевна кэпсээтэ.
Бу тэрээһин үөрэхтээһин үлэһиттэрин тохсунньутааҕы сүбэ мунньахтарын чэрчитинэн ыытылынна. Инникитин даҕаны туризм оҕолору иитиигэ улахан оруоллааҕын өйдөөн туран саха сирин олохтоохторо бэйэлэрин бырайыактарын олоххо киллэрэ туралларыгар баҕарыаҕыҥ.
keskil14.ru