Бүгүн ахсынньы 24 күнүгэр Марфа уонна Сергей Расторгуевтар ааттарынан Саха Өрөспүүбүлүкэтин судаарыстыбаннай циркатыгар оскуола оҕолорун быйылгы сыл саамай күүтүүлээх тэрээһинэ – «Ил Дархан Харыйата – 2023» Сахабыт сирин 700 бастыҥ үөрэнээччитин биир сиргэ түмтэ.
Тэрээһин үгэс быһыытынан уоттаах-күөстээх «Туундара күнэ» диэн цирковой остуоруйаттан саҕаланна. Остуоруйа сүрүн этэр санаата дьиэ кэргэн толору түмсүүллэх буолуута, оҕолор төрөппүттэригэр сыһыаннарын, уонна хоту дойду олохтоохторун эйэҕэс, хорсун майгыларын арыйыы буолар. Туруорааччы режиссер уонна сынаарый ааптара – Мария Харлампьева-Попова.
Өрөспүүбүлүкэбит Ил Дархана Айсен Сергеевич Николаев эҕэрдэ тылыгар кэлэр 2024 сылы Саха Өрөспүүбүлүкэтигэр Оҕо саас сылынан биллэрдэ уонна бу сыл чэрчитинэн саҥа оскуолалар, спортивнай комплекстар, култуура дьиэлэрэ тутуллуохтара, ону таһынан, эһиилги сылтан Бүттүүн Арассыыйатааҕы олимпиадалар кыайыылаахтарыгар 500 тыһыынча солкуобай, призердарга 100 тыһыынча солкуобай ананарын туһунан иһитиннэрдэ. Буолаары турар Азия оҕолоро норуоттар икки ардыларынааҕы оонньуулар Аан Дойду оҕолорун түмэрин уонна оҕолор нөҥүө дойдулар икки ардыларыгар доҕордоһуу үөскүүрүн бэлиэтээн эттэ. Айсен Сергеевич үгэс быһыытынан сыл бастыҥ 10 үөрэнээччитин анал стипендиянан наҕараадалаата.
Бастыҥнар быстыҥнара:
- Семен Необутов, Дьокуускайдааҕы кадетскай оскуола 11 кылааһын үөрэнээччитэ
- Кристина Дрозд, Өрөспүүбүлүкэтээҕи олимпийскай резерва училищатын 9 кылааһын үөрэнээччитэ
- Виктория Алексеева, Бүлүү улууһун Тылыгын орто оскуолатын 11 кылааһын үөрэнээччитэ
- Максим Поповский, Өлүөхүмэ оройуонун 4 №-дээх орто оскуола 11 кылааһын үөрэнээччитэ
- Магомед Наурузов, Мэҥэ Хаҥалас улууһун Аллараа Бэстээх М.Е.Попов аатынан орто оскуола 11 кылааһын үөрэнээччитэ
- Любовь Слепцова, Абый оройуонун А.Е.Слепцов аатынан орто оскуола 10 кылааһын үөрэнээччитэ
- Александра Дмитриева, Дьокуускайдааҕы В.П.Ларионов аатынан физико-техническай лицей 10 кылааһын үөрэнээччитэ
- Власий Югов, Дьокуускайдааҕы классическай гимназия 11 кылааһын үөрэнээччитэ
- Арсен Михайлов, Горнай улууһун А.Н.Осипов аатынан Бэрдьигэстээх орто оскуолатын 11 кылааһын үөрэнээччитэ
- Татьяна Гарипова, Өймөкөөн оройуонун Усть-Нера орто оскуолатын 11 кылааһын үөрэнээччитэ.
Бүгүҥҥү тэрээһин туһунан оҕолор санаалара:
«Бастакы кылаастан ыла оскуола активиһабын уонна бу уон биир сыл устата муспут ситиһиилэрбин түмэн бүгүн бу олус үчүгэй тэрээһиҥҥэ кэлэн турабын. Үс сыл устата Билим Алын Академиятын чилиэнэ буолабын, ону таһынан Бүттүүн Арассыыйа таһымнаах олимпиадаларга кыттан призер буолбутум обществознаие уонна саха тыла биридмиэттэргэ. Бүгүҥҥү остуоруйаны олус сөбүлээтим, сөхтүм. Түгэнинэн туһанан, Айсен Сергеевичка бэйэм уонна оҕолор ааттарыттан махталбын тиэрдиэхпин баҕарабын, оҕолору олус элбэххэ өйүүр уонна бу кэлэр сылы Оҕо Саас сылынан биллэрбитэ наһаа үчүгэй. Эһиилги дьылга олимпиадаларга кыттар оҕолорго олус күүстээх стимул, мотивация биэрэр. Өрөспүүбүлүкэ оҕолоругар баҕарыам этэ харса суох барытыгар кыттан иһэргитигэр, конференцияларга уонна олимпиадаларга көхтөөхтүк кыттыҥ, бу олус элбэх суолу арыйар, элбэх араас куораттары кэрийиэххит, сайдыаххыт. Оскуолаҕа үөрэнэр сылларгытын киэргэтиэххит диэн бэйэм баҕа санаабын этэбин».
Алина НОГОВИЦЫНА, Лөгөй орто оскуолатын
11 кылааһын үөрэнээччитэ, Уус Алдан улууһа.
«Бүгүҥҥү тэрээһин олус үчүгэйдик ааста, биһиги Ил Дархаммыт оҕолору өйүүрүн өссө төгүл көрдөрдө, онтон биһиги олус үөрэбит. Бу тэрээһиҥҥэ ыҥырыллыбыппыттан наһаа үөрэбин, тэрийээччилэргэ махтанабын. Барыгытын кэлэн иһэр 2024 сылынан эҕэрдэлиибин!»
Антон ЯКОВЛЕВ, Өрөспүүбүлүкэтээҕи лиссиэй — интэринээт
11 роснефть кылааһын үөрэнээччитэ
Бу курдук, сыл бастыҥ көрдөрүүлээх үөрэнээччилэрин чиэстиир өрөгөйдөөх тэрээһин олус сэргэхтик, аптаах эйгэлээх буолан ааста. Кыттыылаахтарга инникитин даҕаны бу курдук билиигэ тардыһыылаах, олоххо актыыбынай позициялаах буолалларыгар баҕарыаҕыҥ.
Тэрээһин туһунан сиһилии биһиги Телеграм уонна Вконтакте социальнай ситимнэрбитигэр киирэн көрүөххүтүн сөп. Барыгытын кэлэн иһэр Саҥа 2024 сылынан!