Биһиги оскуолабыт Филипп Гаврильевич Охлопков аатын 2014 сылтан чиэстээхтик сүгэр. Ф.Г. Охлопков Саха республикатын тыатын хаһаайстыбатын үлэһитэ, Мэҥэ-Хаҥалас улууһун уонна Ходоро нэһилиэгин бочуоттаах олохтооҕо, журналист, Российскай Федерация Саха сиринээҕин рескомун сэкэрэтээрэ, Ил Түмэн депутата. 2026 сылга Филипп Гаврильевич Охлопков 90 сааһын бэлиэтиэхпит. Онно туһаайыллыбыт тэрээһин үлэлэр саҕаланныллар.
Мэҥэ-Хаҥалас улууһун Аҕа баһылыга Дмитрий Иванович Тихонов тус дьаһалынан, Филипп Гаврильевич Охлопков аатынан Майа орто оскуолатыгар Ходоро нэһилиэгин сиригэр оҕуруот аһын ыһарга аналлаах, бас билиигэ 5 Га сир анаммыта.
«Оҕону үлэнэн иитии» саҥа киирбит федеральнай сокуон чэрчитинэн балаҕан ыйыттан оскуолабытыгар «Үлэ киһини киэргэтэр» диэн девизтээх суббуотунньуктар, улэ десаннара ыытылыннылар.
Ол курдук балаҕан ыйын 8 күнүгэр Ходоро нэһилиэгин Аҕа баһылыга Виктор Егорович Федоров кыттыылаах сирбитин-уоппутун алҕаан үлэ десаннарыгар старт бэриллибитэ. Хортуоппуйбут сиригэр баҕана туруоран, күрүөлээһин үлэтэ тэрилиннэ. 8-11кылаастар уолаттара, эр дьон үлэһиттэр, аҕалар күргүөмүнэн субуотунньуктарга кытыннылар.
«Үлэ киһини киэргэтэр» диэн өс хоһооно этэринии оҕо кыра эрдэҕиттэн үлэҕэ сыстаҕас буола улааттаҕына, инники олоҕор харгыстары көрсүбэт, туохтан да толлубат буола үөрэнэр. Күһүҥҥү сылаас күннэри бааттаһан, айылҕалыын алтыһан, үлэни өрө туттубут. Эһиил бэйэбит олордубут хортуоппуйбут өлгөмнүк үүнэн кыһын устата тото-хана амсайыахпыт диэн бигэ эрэллээхпит.
Ф.Г. Охлопков аатынан Майа орто оскуолата,
ОхлопоковNews медиа киин