Балаҕан ыйын 22 күнүгэр ЯАССР үтүөлээх учуутала, ЯАССР, СРФСР, СССР үтүөлээх тренера Дмитрий Петрович Коркин төрөөбүтэ 95 сылын көрсө Д.П.Куоркун аатынан Чурапчытааҕы республиканскай спортивнай олимпийскай эрэллэри бэлэмниир орто оскуола-интэринээтигэр урукку сыллар выпускниктарын көрсүһүү дьоро киэһэтэ буолан ааста.
Үбүлүөйдээх тэрээһиммитигэр кэлбит оскуолабыт выпусктара сарсыарда оҕолорго кылаас чаастарын уонна маастар кылаастары ыыттылар, ыспартыыбынай түмэлгэ сырыттылар, оҕо саастарын санаан интэринээт хааһытын амсайдылар. Алын кылааһы бутэрбит үөрэнээччилэр «Юный
Коркинец» кэккэтигэр киирбиттэрин чиэстээтилэр. Ол кэннэ «Куоркуннуун алтыспыт үтүө кэмнэрим» диэн ахтыы киэһээтэ буолла. Манна биһиги оскуолабыт иитиллээччилэрэ, үлэһиттэрэ эҕэрдэ кэнсиэр көрдөрдүлэр.
Чахчы даҕаны Д.П.Куоркун уһуйбут, такайбыт оҕолоро үөрэммит оскуолаларын аатын эрэ буолбакка бүттүүн Саха сирин аатын Аан дойдуга ааттаппыттара, аар саарга аатырдыбыттара.
Өрөспүүбүлүкэбит араас муннуктарыттан ыраахтан-чугастан мустан чулуу тренербитин чиэстээн, кини туһунан бу киэһээ истинник-иһирэхтик ахтан-санаан аастылар.
«Чэбдик» пресс-киин