16 саастаах Харитон Павлов биир баҕа санаата быйыл туолла! Кини Өрөспүүбүлүкэбит Ил Дархана Айсен Сергеевич Николаев хайдах, туох үлэлиирин илэ хараҕынан көрүөн-билиэн, Саха сирин Аҕа Баһылыгын кытары биир үлэ күнүн бииргэ атаарыан отой кыра эрдэҕиттэн ыра санаа оҥосторо. Ол баҕа санаата атырдьах ыйын 28-гар туолла!
Харитон Саха Өрөспүүбүлүкэтин Бырабыыталыстыбатын 1 №-дээх дьиэтигэр Айсен Сергеевич үлэлиир кабинетын көрөн, Бырабыыталыстыба үлэһиттэрин кытары билсэн, бииргэ мунньахтаан, тутулла турар объектарынан, саҥа үлэҕэ киирбит «Квартал труда» кластерга сылдьан, устудьуоннары кытары көрсөн, оннооҕор Ил Дарханныын бииргэ үөрэнэр оҕолоругар быһа сибээскэ тахсан соһуталаата.
Харитон быйыл Өрөспүүбүлүкэтээҕи лицей-интернакка 10 кылааска үөрэнэ киирдэ. 9 кылааска диэри кини Чурапчы улууһун Мындаҕаайы нэһилиэгин Р.И. Константинов аатынан Амма орто оскуолатыгар үөрэммитэ. Аҕата Данил Данилович, ийэтэ Туйаара Ивановна, Павловтар дьиэ кэргэн улуустааҕы дьиэ кэргэн күрэҕин кыайыылаахтара, өрөспүүбүлүкэҕэ «Бастыҥ тыа сирин дьиэ кэргэнэ» анал аат хаһаайыттара. Дьиэ кэргэн түөрт оҕолоохтор, икки кыыс уонна икки уол. Харитон иккис оҕо.
Быйыл саас өрөспүүбүлүкэтээҕи дьиэ кэргэн күрэҕин кыайыылаахтара Айсен Николаевы кытары көрсүһүүлэригэр Харитон, дьоллоох түгэни мүччү туппакка, Ил Дарханы кытары биир күнү атаарыан туһунан баҕа санаатын эппитэ. Ол оруобуна саҥа үөрэх дьыла үүнээри турдаҕына, туолла!
Cиһилии видеоҕа көрүҥ:
keskil14.ru