Үөрэх үлэһиттэрин Атырдьах ыйынааҕы сүбэ мунньахтарын чэрчитинэн Бырабыыталыстыба 2 №-дээх дьиэтигэр СӨ билимин Академията иһинэн үлэлиир Төрөөбүт тыллары чинчийэр, харыстыыр уонна сайыннарар киин «Үөрэх эйгэтигэр төрөөбүт тыллар: сайдыы саҕахтара» төгүрүк остуолу тэрийэн ыытта.
Мунньахха оскуола үөрэнээччилэрэ, «Күн» хамсааһын кыттыылаахтара Саша Докторов («Айыы кыһата» гимназия), Арчылаан Никифоров (Покровскай оскуолата), Юра Павлов (Хаптаҕай оскуолата) төрүт тылы харыстыырга этиилэрэ уонна туруорсар боппуруостара кыттааччылар болҕомтолорун ылла.
Ол туһунан Мэҥэ Хаҥалас улууһун Кеша Алексеев аатынан Хаптаҕай орто оскуолатын 11 кылааһын үөрэнээччитэ Юра Павлов кэпсиир:
— Быйыл сайын дойдубут 3 улууһугар Мэҥэ-Хаҥаласка, Намҥа, Бүлүүгэ төрөөбүт тылбыт сүтэр кутталлаах диэн сүрүн тыын боппуруоһу көрөр көрсүһүүлэр буолан аастылар. Бу «Ийэ тыл кэскилэ» уопсастыбаннай түмсүү, салайааччы Вилюяна Никитина, көҕүлээһининэн ыытылыннылар. Билигин алын уонна орто кылаастар сахалыы тылынан үчүгэйдик саҥарбаттар, онтон сорох оҕолор төрөөбүт тылларын үчүгэйдик билбэттэр. Ол көрсүһүүлэргэ улуус оҕолорун муһан, бары бииргэ ити баар кыһалҕаны хайдах көннөрүөххэ сөбүн быһаарыспыппыт.
Ити кэннэ Дьокуускай куорат Өрөспүүбүлүкэтээҕи лиссиэй-интэринээтигэр “Ойкумена” лааҕырга түмсүбүппүт. Онно биһиэхэ историктар, чинчийээччилэр, суруйааччылар, артыыстар уо.д.а. лекциялары ыыппыттара. Онно форум ыытаммыт, биһиги сүрүн кыһалҕабытын быһаарбыппыт.
Билигин көлүөнэлэринэн ылан көрдөххүнэ, аҕа көлүөнэлэр ыраастык уу сахалыы саҥараллар, эдэр көлүөнэ булкуйан нууччалыы-сахалыы саҥараллар, онтон кыра көлүөнэ, ол эбэтэр алын уонна орто кылаас үөрэнээччилэрэ, саха тылын үчүгэйдик билбэттэр, сорохторо олох даҕаны саҥарбаттар. Маны көннөрөр сыаллаах-соруктаах биһиги өрөспүүбүлүкэ оҕолорун түмэр “Күн” диэн хамсааһын тэрийэр санааҕа киирбиппит. Бу хамсааһыммытын тарҕатар сыалтан биһиги араас түмсүүлэри, дьаарбаҥкалары кэрийэн дьонно сырдатабыт. Төгүрүк остуолга хамсааһыммыт хайдах үөскээбитин, сыалын соругун уонна инники былааммытын сырдаппыппыт. Сүрүн сыалбыт диэн өрөспүүбүлүкэбит араас муннуктарыттан биһиги саҕалааһыммытын учууталлар, салайааччылар өйүүллэригэр уонна сотору буолуохтаах учредительнай сийиэспитигэр кыттыыны ылалларыгар сытар. Биһиги сыалбыт биһиги хамсааһыммытыгар элбэх оҕону түмүү уонна оҕо төрөөбүт тылын билэ улаатарын ситиһии.
Киэҥ уонна күүстээх санаалаах ыччаттарбытыгар саҥа саҕалааһыннарыгар ситиһиилэри баҕарабыт!
keskil14.ru