«Спортивные якутяне» Саха Өрөспүүбүлүкэтин үөрэнээччилэрин спартакиадатыгар буулдьанан ытыыга барыта 80 спортсмен кытынна. Хамаандаанан кыайыыны Горнай улууһа ситистэ, иккиһи Дьокуускай куорат хамаандата, үсүһү Бүлүү улууһун хамаандата ыллылар. Бүгүн биһиги буулдьанан ытыы күрэҕин старшай судьуйатын Николай Егоровы кытары кэпсэтэбит.
Николай Афанасьевич Егоров Горнай улууһугар Олимпийскай эрэллэр оскуолаларыгар 19 сыл тренерынан үлэлээн кэллэ, билигин кини оружейник быһыытынан сылдьар, уопуттаах, киэҥ көрүүлээх тренер.
— Буулдьанан ытыыга барыта 21 хамаанда кыттыыны ылла. 21 улуустан спортсменнар икки күннээх тыҥааһыннаах киирсиигэ күөн көрүстүлэр. 80 оҕо бары сүүмэрдээһини ааспыт буолан, көрдөрүүлэрэ үчүгэй. Кыттааччылар истэригэр «Азия оҕолоро» спортивнай оонньууларга киирбит оҕолор эмиэ бааллар. Бу күрэхтэһии түмүгүнэн сүүмэрдиир хамаандаҕа кимнээх киирэллэрэ быһаарыллыахтаах. Аны биир ый курдугунан спортсменнар «Юный стрелок России» оҕолорго күрэхтэһиигэ кыттыыны ылыахтара.
— Буулдьанан ытыы биһиги өрөспүүбүлүкэбитигэр төһө сайдан турарый?
— Кэнники кэмҥэ бу көрүҥ күүскэ сайдан иһэр. Буулдьанан ытыы Федерациятыгар национальнай ытыыны киллэрбит буолан, элбэх улуус дьарыктанар буолла. «Манчаары оонньууларыгар» маастар нормативтаах национальнай көрүҥнэр (Белка-ПС) бааллар, ол иһин муниципальнай оройуоннар саа-сэп ылан күүскэ дьарыктанар буоллулар. Элбэх улууска, билигин үчүгэй ытар тэрил кэлэн, оҕолор, улахан дьон күүскэ дьарыктаналлар. Биһиэхэ адаптивнай спортка ытыыга Евдокия Каторгина, Мария Егорова Россияҕа лиидэрдэр буолаллар. Кинилэр оҕолорго эмиэ улахан стимул биэрэллэр. Ону таһынан оҕолорго сылын аайы Россия первенствота ыытыллар. Билигин спортоскуолаларга үчүгэй тиирдэр өссө эбии арылыннахтарына, конкуренция баар буоллаҕына, өссө күүскэ сайдан иһиэҕэ.
— Саханы кыраҕы харахтаах бэргэн ытааччы, бастыҥ булчут дииллэр, онтон саха оҕотугар ытыыга дьоҕура хааныгар баар дуо?
— Буулдьанан ытыыга кытаанах ньиэрбэ наада. Оҕо улаханнык долгуйбат буолуон наада. Былыр-былыргыттан биһиги өбүгэлэрбит бултаан-алтаан айахтарын ииттэн кэллэхтэрэ, онон саха оҕото өбүгэлэрин утумнаан, бу спорт көрүҥүн түргэнник ылынар. Саанан ытарга холку, тулуурдаах буолаллар. Хомойуох иһин, кэнники кэмҥэ компьютер, телефон көрүүтэ оҕолор харахтарыгар охсор буолла, ол куһаҕан уонна кыһалҕа. Ордук киин улуустар оҕолоро ыллараллар, онтон сибээс суох сиригэр, эбэтэр кэнники Интернет киирбит сиригэр, оҕолор харахтарын доруобуйалара арыый үчүгэй буолар.
— Николай Афанасьевич, кэпсэтиибит иһин махтал. Оҕо эт-хаан, өй-санаа өттүнэн сайдарыгар бэринилээх үлэҕит сыанабыллаах уонна ситиһиилээх буоллун!
— Махтал.
Кэпсэттэ Анна СЛЕПЦОВА.
Буулдьанан ытыыга республика чөмпүйүөннэрэ уонна призердара, хаартыскалары көрүҥ.
keskil14.ru