Кып-кыраһыабай кыыс уонна тустуу көбүөрэ… бэйэ-бэйэлэригэр хайдах да майгыннаспаттар. Мин, “Кэскил” медиа-оскуола юнкора, Саха өрөспүүбүлүкэтин үөрэнээччилэрин Сайыҥҥы спартакиадатыгар тустуу күрэҕин сырдатыыга үлэлии сылдьаммын Виктория Барашкованы бэлиэтии көрдүм уонна интервью ыллым.
Виктория Чурапчыттан төрүттээх, дьоно Арыылаахха олороллор. Оҕо сылдьан спордунан дьарыктаныытын тустууттан саҕалаабыт. Онуоха бииргэ төрөөбүттэрэ, тустуук уолаттар улахан оруолу оонньообуттар. Кинилэри батыһан тустууга кэлбит. Улааттахпына спорт бу көрүҥэр хайаан да судьуйа буолуом диэн сыаллаах-соруктаах улааппыт.
Виктория этэринэн, судьуйа аан бастаан чиэһинэй, икки спортсмен икки ардыгар буола турар хапсыһыыга сөптөөхтүк санаатын этэр, бэйэтигэр эрэллээх буолуохтаах. “Биллэн туран, судьуйа бастакы уочарат тустууну билиэхтээх. Мээнэ киһи уулуссаттан киирэн судьуйалаан барбат. Күүстээх санаалаах буолуохтаах. Тоҕо диэтэххэ, көрөөччүлэртэн, тренердэртэн араас саҥаны-иҥэни истиэххин сөп. Ону барытын тулуйуоххун, кыайыаххын наада”, – диэн судьуйа кыыс санаатын үллэстэр.
Виктория тустууга судьуйалыыр үлэтин 2013 сылтан саҕалаабыт. Россия, Дальнай Восток турнирдарыгар тиийэ судьуйалыыр эбит. “Сотору кэминэн Россия чемпионатыгар судьуйалыы барыахтаахпын”, – диир.
Виктория тустууга Россия таһымыгар элбэх ситиһиилээх буолан, кинини эрдэттэн билэллэр эбит. Ол кини судьуйа буолан тахсарыгар улахан көмөлөөх буолбут. “Судьуйа кыргыттары Россияҕа өйүүллэр”, – диир.
Виктория эппитин курдук, кыыс оҕо тустуунан дьарыктанарыгар аан бастаан баҕа наада. “Баҕалаах, интэриэстээх буоллаҕына, элбэҕи ситиһэр. Сорохтор тустуук кыргыттары уол курдук буолаллар дииллэр даҕаны да, оннук буолбатах. Бэйэҕиттэн тутулуктаах. Кыыс оҕо кэрэ көстүүтүн тустуу сабырыйан кэбиспэт. Холобур, биһигини хаһан даҕаны тустуук курдук көрбөттөр этэ. Төрөппүттэр кыргыттаргытын тустууга биэрэртэн куттанымаҥ”, – диэн Виктория үөрэ-көтө санаатын үллэһиннэ.
Кини М.К. Аммосов аатынан Хотугулуу-Илиҥҥи Федеральнай университет физкультурнай институтун үөрэнэн бүтэрбит. Билигин Дьокуускайга 3 №-дээх оҕо спортивнай оскуолатыгар, 25 №-дээх орто оскуолаҕа тренеринэн үлэлиир. Кыыс оҕолоох.
Иванна Николаева, “Кэскил” медиа-оскуола юнкора, Хадаар, Чурапчы.
Ааптар хаартыскаҕа түһэриитэ