Москва. Кыһыл болуоссат. Улуу Кыайыы 78 сылын уруйдуур байыаннай парады быһа эфиргэ көрдүм.
Аҕа дойду Улуу сэриитигэр сэбиэскэй норуот оҥорбут хорсун быһыытын сыаналаан, СНГ сэттэ судаарыстыбатын салайааччылара Улуу Кыайыы 78 сылын парадын кэлэн көрдүлэр. Ол курдук, Казахстан президенэ Касым-Жомарт Токаев, Белоруссия президенэ Александр Лукашенко, Киргизия президенэ Садыр Жапаров, Узбекистан президенэ Шавкат Миризиев, Армения премьер министра Никол Пашинян, Таджикистан президенэ Эмомали Рахмон уонна Туркмения президенэ Сердар Бердымухамедов.
Урукку өттүгэр Сэбиэскэй сойуус састаабыгар киирэр өрөспүүбүлүкэлэр хас биирдиилэрэ Улуу Кыайыыга киллэрсибит сүҥкэн улахан кылааттаахтар, бырааттыы норуоттар Аҕа дойду Улуу сэриитин ыар сүтүктэрин, кырыктаах кыргыһыытын, эрэйин-муҥун тэҥҥэ үллэстибиттэрэ. Быһа эфиргэ этэн аһарбыттарын курдук, Армения 106 буойуна Аҕа дойду Улуу сэриитигэр көрдөрбүт хорсун быһыытын иһин Сэбиэскэй сойуус Геройун аатын сүкпүт.
Быйылгы парадка анал байыаннай эппэрээссийэ кыттыылаахтара, геройдара, байыаннай кэрэспэдьиэннэр ыҥырыылаах ыалдьыт буолан кэлбиттэр.
Кыһыл болуоссакка Байыаннай парады 10-с сылын Сухопутнай сэриилэр главнокомандующайа, армия генерала Олег Салюков хамаандалаан ыытта. “Онон Олег Салюковы бу үбүлүөйдээх бэлиэ түгэнинэн эҕэрдэлиибит”, – диэн быһа эфиргэ чопчулаан эттилэр.
Кыайыы парадыгар Россия Президенэ В.В. Путин бочуоттаах миэстэҕэ олорор Аҕа дойду Улуу сэриитин кыттыылаахтарын барыларын кытта илии тутуһан дорооболосто. Кинилэр ортолоругар байыаннай летчик, Россия үрдүнэн билигин соҕотох хаалбыт штурман бомбардировщик, 98 саастаах Галина Павловна Брок-Бельцова баар.
Дойдубут президенэ парадка эппит тыллара хас биирдии киһиэхэ тиийимтиэ, төрөөбүт дойдуга бэриниини, тапталы үөскэттэ, өйдөттө дии саныыбын. Владимир Владимирович аан дойдуга Россияны утары ыытыллар дьайыыларга биһиги бэриммэппитин, дойдуга куттал суох буолуутун хааччынар кыахтаахпытын туһунан эттэ. “Россияҕа доҕордуу сыһыана суох норуот диэн суох”,– диэн В.В. Путин бэлиэтээн эттэ.
Кыайыы парадыгар сэбилэниилээх күүстэр маршировкалара, бойобуой техника араас көрүҥнэрэ бүгүҥҥү күҥҥэ биһиги дойдубут күүһүн-кыаҕын көрдөрдүлэр.
Олег АДАМОВ, Х кылаас, 1-Хаҥалас, Ньурба.