Лонгинов Мичил Иванович, Билим уонна үөрэх Николаев Михаил Ефимович аатынан Өктөмнөөҕү киинин дириэктэрэ:
—Билим уонна үөрэх Николаев Михаил Ефимович аатынан Өктөмнөөҕү Киинэ тохсунньу 6 күнүгэр 1874 сыллаахха төрүттэммитэ. Арҕаа Хаҥаласка аан маҥнайгы үөрэх кыһатынан биллэр. Инородец Иван Павлов харчытынан тутуллубута уонна Алексеевскай народнай училище диэн ааттаммыта.
Билигин Билим уонна үөрэх Николаев Михаил Ефимович аатынан Өктөмнөөҕү киинин иһинэн “Мичээр” биэбэйик, Өктөм лиссиэйэ, Технопарка, 75 миэстэлээх интэринээт, 8 кыбартыыралаах учууталлар дьиэлэрэ, Үөрэҕирии мусуойа уонна Николаев Михаил Ефимович төрөөбүт мусуой-дьиэтэ үлэлииллэр. Лиссиэйгэ барыта 262 оҕо үөрэнэр. Интэринээккэ бүгүн өрөспүүбүлүкэ 18 улууһуттан оҕолор кэлэн үөрэнэллэр уонна олороллор. VIII кылаастан үс хайысханан үөрэтии баар: инженерно-техническэй, медико-технологическай уонна IT.
1998 сылтан Өктөм лиссиэйин 700 тахса үөрэнээччи бүтэрэн, өрөспүүбүлүкэбит, дойдубут уонна Аан дойду үрдүнэн үөрэх үрдүк кыһаларыгар үөрэнэн, бүтэрэн, үлэлии-хамсыы сылдьаллар. Лиссиэйбит үлэтигэр, сайдарыгар бары күүс-көмө буолаллар, өйүүллэр.
2022 сылга Николаев Михаил Ефимович 85 сааһын туолар өрөгөйдөөх үбүлүөйүгэр Билим уонна үөрэх Өктөмнөөҕү Киинигэр Саха Өрөспүүбүлүкэтин бастакы Президенэ Михаил Ефимович аатын иҥэрдилэр.
Бу быһаарыныыны Хаҥалас улууһун депутаттарын сэбиэтэ ылынна.
Леонтьева Жанна бэлэмнээтэ.